پریاگ راج: چھیڑ چھاڑ کی شکایت پر تشدد

پرياگ راج میں شرپسندوں نے چھیڑ چھاڑ کی مخالفت کرنے پر لڑکی کے والد کو پیٹ پیٹ کر ہلاک کر دیا۔

ریاست اتر پردیش کے ضلع پریاگ راج کے میجا روڈ علاقے کے لوتر میدنیاں گاؤں میں شرپسندوں نے ایک شخص کو پیٹ پیٹ کر ہلاک کر دیا۔

بتایا جا رہا کہ میدنیاں گاؤں میں ایک لڑکی اپنے گھر کی چھت پر کپڑے سکھانے گئی تبھی گاؤں کے مادھو نشاد، کلو اور گولو نامی شخص نے لڑکی کو اشارہ کیا جس پر لڑکی نے اپنے اہل خانہ کو پوری بات بتائی۔

اس معاملے کے بعد لڑکی کے والد اور بھائی شرپسندوں کے گھر شکایت لے کر گئے، دونوں فریقوں کے بیچ کہا سنی ہو گئی اور دیکھتے ہی دیکھتے شرپسندوں نے ان کے ساتھ مار پیٹ شروع کر دی۔ کسی طرح لڑکی کے والد اپنے گھر پہنچے لیکن تھوڑی دیر بعد ہی ان کی موت ہو گئی۔

ایس پی یمناپار سوربھ دیکشیت نے بیان جاری کرتے ہوئے بتایا کہ 'لڑکی اپنے گھر کی چھت پر کپڑے پھیلانے گئی، تبھی ان لڑکوں نے اسے اشارہ کیا، جس کی شکایت لڑکی کے والد ان کے گھر لے کر گئے، تبھی اُن کے ساتھ مار پیٹ ہوئی اور ہارٹ اٹیک سے اُن کی موت ہوئی ہے۔'

اس کے برعکس لڑکی کے بھائی نے بتایا کہ ' مار پیٹ کے دوران زخمی ہونے سے والد کی موت ہوئی ہے۔

ایس پی یمناپار سوربھ دیکشیت نے بتایا کہ 'آٹھ لوگوں کو نامزد کیا گیا ہے، جس میں تین لوگوں کو گرفتار کر کے پوچھ گچھ جاری ہے، جلد ہی دوسرے سبھی ملزمین کو گرفتار کر لیا جائے گا۔