پیلی بھیت:بی جے پی رہنما ورون گاندھی نے ہفتہ کو یہاں کی ایک مقامی عدالت میں وارانسی کے ایک شخص کے خلاف ٹویٹر پر ان کے والد کے خلاف مبینہ طور پر توہین آمیز تبصرہ کرنے پر ہتک عزت کا مقدمہ دائر کیا ہے۔ ورون گاندھی ہفتہ کی سہ پہر تین بجے تین وکیلوں کے ساتھ عدالت کے احاطے میں آئے اور ایڈیشنل چیف جوڈیشل مجسٹریٹ (II) ابھینو تیواری کے سامنے ہتک عزت کا مقدمہ دائر کیا۔
ایک وکیل نے بتایا کہ عدالت نے ورون گاندھی کا بیان ریکارڈ کیا اور سماعت کی اگلی تاریخ 25 اپریل مقرر کی۔ گاندھی نے شکایت میں کہا کہ ان کے والد آنجہانی سنجے گاندھی ملک کے معروف سیاست دان تھے اور پورے ملک میں ان کی عزت کی جاتی تھی اور اب بھی ہے۔ ورون گاندھی نے عدالت کو بتایا کہ 29 مارچ 2023 کو وارانسی ضلع کے بھوجوبیر کے رہنے والے وویک پانڈے نے اپنے سوشل میڈیا ٹویٹر @vivekkumar IND کے ذریعے سنجے گاندھی کے خلاف نازیبا تبصرہ کیا تھا۔ گاندھی کے مطابق ملزم نے خود کو نیشنلسٹ ہندو اور کسان مورچہ کا جنرل سکریٹری بتایا تھا۔ گاندھی نے یہ بھی کہا کہ انہیں بیسال پور علاقہ میں بلسانڈہ کے دورہ کے دوران عام لوگوں کے ذریعہ ٹویٹ کے بارے میں مطلع کیا گیا تھا۔