وارانسی: گھریلو تشدد کو روکنے کے لیے خاص ڈیوائس کا ایجاد

ایک جانب جہاں کورونا وائرس کی وجہ سے بین الاقوامی سطح پر تشویش کا اظہار کیا جا رہا ہے تو وہیں اس کی وجہ سے دیگر مسائل بھی پیدا ہوگئے ہیں جس میں گھریلو تشدد قابل ذکر ہے۔

اس مسئلے پر بیشتر ممالک نے تبادلہ خیال بھی کیا لیکن ریاست اتر پردیش کے دارالحکومت کے شہر وارانسی کی رہنے والی انجلی شریواستو نے اس مسئلہ کے حل کے لیے ایک ڈیوائس بنایا ہے جو نہ صرف گھریلو تشدد کو روکنے میں معاون ثابت ہوگا بلکہ خواتین کے تحفظ میں بھی بہترین کردار ادا کرسکے گا۔

انجلی شریواستو نے ای ٹی وی بھارت سے بات کرتے ہوئے بتایا کہ لاک ڈاؤن کے درمیان نیوز چینلز اور اخبارات میں خواتین پر گھریلو تشدد کے واقعات میں اضافہ دیکھنے کو ملا ہے جس پر میں فکرمند ہو گئی تھی اور گھر میں موجود سامان کو استعمال کرکے ایک آلہ تیار کیا جو نہ صرف خواتین اور بچوں پر ہونے والے تشدد کو روکنے میں مددگار ثابت ہوگا بلکہ خواتین اور لڑکیوں کی تحفظ میں بھی معاون رہے گا۔

انہوں نے کہا کہ یہ الیکٹرانک ڈیوائس ہے جس میں سم کارڈ، بیٹری سینسر و دیگر اشیاء لگی ہیں اس میں ایک چھوٹا سا بٹن ہے جس کو دبانے پر خواتین تحفظ ٹول فری نمبر پر کال کیا جا سکے گا۔

انہوں نے کہا کہ اس میں جی پی ایس سسٹم بھی شامل ہے اور آواز ریکارڈ کر کے بھی محفوظ کر سکتے ہو تاکہ پولیس کو پختہ ثبوت حاصل ہوسکے۔

انجلی شریواستو نے بتایا کہ 'اس ڈیوائس کی حد 100 میٹر تک ہے اس کی بیٹری 7 سے 8 گھنٹہ چلے گی، وائرلس بٹن بہت چھوٹا ہے جس بآسانی جیب میں چھپا کر رکھا جا سکتا ہے، گھر کے اندر کسی بھی قسم کا تشدد ہو تو ایک بٹن دبانے پر فوراً پولیس کو کال جائے گی۔

انہوں نے کہا کہ اس ڈیوائس کو تیار کرنے میں تقریباً دو سے تین ہزار روپیہ کا خرچ آیا ہے اگر حکومت مدد کرے تو یہ اور سستے میں بھی تیار ہو سکتا ہے اور ضرورت کے مطابق خواتین کو اسے استعمال کرنا چاہیے تاکہ خواتین اور بچوں پر ہونے والے تشدد میں کمی واقع ہو۔