بنارس کے شہر قاضی نے قبلہ اول پر ہورہے حملوں کی مذمت کی

اسرائیلی افواج کی جانب سے بیت المقدس پر ہورہے حملوں کی سخت مذمت کرتے ہوئے بنارس کے شہر قاضی غلام یاسین نے کہا کہ ہم بھارتی حکومت سے مطالبہ کرتے ہیں وہ دخل اندازی کرکے اس حملے کی مخالفت کرے۔

ای ٹی وی سے بات کرتے ہوئے شہر قاضی نے کہا کہ بیت المقدس اور مسجد اقصیٰ تمام مسلمانوں کے لیے معزز ہے۔ پوری دنیا کے مسلمانوں کے لیے لائق احترام ہے۔ اس پر اسرائیلی افواج کی جانب سے حملہ اور وہاں پر موجود نمازیوں پر بندوق کی گولی باری کی ہم شدید مذمت کرتے ہیں۔

ہم بھارتی حکومت سے مطالبہ کر رہے ہیں کہ اس معاملے میں دخل اندازی کرکے اس حملے کی مخالفت کرے اور اس کے روکنے میں اپنا کردار ادا کرے۔

شہر قاضی شہر غلام یاسین کے ترجمان مولانا جمیل نے بھی اس حملے کی سخت الفاظ میں مذمت کی ہے۔

انہوں نے کہا کہ فلسطینی مسلمانوں پر جس طریقے سے مظالم ڈھائے جا رہے ہیں، بیت المقدس اور مسجد اقصیٰ میں پڑھ رہے نمازیوں پر گولی باری کی جارہی ہے، وہ انسانیت کے خلاف ہے۔

انہوں نے کہا کہ اسرائیل کو چاہیے کہ اپنے افواج کو واپس بلائے اور امن و امان کی فضا قائم کرے۔ انہوں نے مزید کہا کہ پوری دنیا کو اس حملے کی مذمت کرنا چاہئے اور سبھی کو ایک آواز میں اس کی مخالفت کرنی چاہیے۔ خاص کر مسلم ممالک کو اس معاملے میں پیش قدمی کرنی چاہیے۔