سماجوادی پارٹی رہنما کی مولانا اسد رضا سے ملاقات

ریاست اتر پردیش کے ضلع مظفر نگر میں سماجوادی پارٹی کے رہنما اتل پردھان نے ضلع میں شہریت ترمیمی قانون کے خلاف احتجاج کے دوران تشدد میں زخمی ہونے والے مولانا اسد رضا حسینی کی رہائش گاہ پر اُن سے ملاقات کی۔

اتل پردھان نے احتجاج کے دوارن زخمی ہونے والے مولانا اسد رضا حسینی کی صحت کے بارے معلومات حاصل کی، اتل پردھان نے کہا کہ وزیراعلیٰ یوگی آدتیہ ناتھ کہتے ہیں کہ ہم انتقام لیں گے، بلڈوزر چلائیں گے، یہ ان کی سوچ ہے لیکن ہم وزیراعلیٰ کو اس دن کی یاد دلانا چاہتے ہیں جب انہوں نے کہا تھا کہ پولیس نے میرے ساتھ بدسلوکی کی ہے، مجھے مارا پیٹا ہے۔

انہوں نے کہا کہ یوگی آدتیہ ناتھ جس پولیس کی بدسلوکی پر رو پڑے تھے وہ آج لوگوں کے ساتھ وہی سلوک کررہے ہیں، وہ اسی راستے سے اقتدار حاصل کرنا چاہتے ہیں۔

انہوں نے کہا کہ سماجوادی پارٹی کا مطالبہ ہے کہ جہاں بھی تشدد ہوا ہے اس کی تحقیقات ہائی کورٹ کے جج کے ذریعہ کرائی جائے تا کہ اصل معاملہ سامنے آئے۔