اردو زبان کو فروغ دینا ہی مقصد: اردو اکادمی

اردو اکادمی کے سکریٹری آئی اے ایس زہیر بن صغیر نے کہا کہ اردو زبان کو گھر گھر تک پہنچانے اور اکادمی کی اسکیموں کو عوام تک پہنچانے کی پوری کوشش کی جائے گی۔ اردو کی تعلیم کا انتظام بھی بہتر کیا جائے گا، وہیں اردو آئی اے ایس اسٹڈی سینٹر کے لیے مزید کوشش کی جائے گی تاکہ بڑی تعداد میں طلبا آئی اے ایس، پی سی ایس افسر بن سکیں۔

اتر پردیش اردو اکادمی کے نئے سکریٹری آئی اے ایس زُہیر بن صغیر نے ای ٹی وی بھارت سے خصوصی بات چیت کے دوران کہا کہ سبھی اس بات کو مانتے ہیں کہ اردو بہت ہی پیاری اور شیریں زبان ہے۔ ملک کے مختلف حصوں میں بولی اور سمجھی جاتی ہے۔ اردو کے شیدائیوں کی تعداد بے شمار ہے۔ بہت سارے لوگ اردو سیکھنا اور پڑھنا چاہتے ہیں، ہماری کوشش ہوگی کہ ایسے سبھی لوگوں تک اردو پہنچے۔

سکریٹری زہیر بن صغیر نے کہا کہ اردو زبان کی کتابوں کا ترجمہ ہونا چاہیے۔ بہت سارے لوگ غزل سننا پسند کرتے ہیں اور ان کے معنیٰ بھی جاننا چاہتے ہیں۔ ایسے میں ہم ان لوگوں تک پہنچنے کی کوشش کریں گے۔ انہوں نے مزید کہا کہ اتر پردیش اردو اکادمی کا آئی اے ایس اسٹڈی سینٹر ہے۔ ہمارا مقصد ہے کہ وہاں کے بچوں کو بہتر کوچنگ ملے اور صحیح طرح سے ان کی رہنمائی ہو۔

انہوں نے کہا کہ ہمارا مقصد ہے کہ ہمارے یہاں کے طلبا ملک کی مختلف ریاستوں میں ہونے والے پی سی ایس امتحانات میں بھی شامل ہوں اور کامیابی حاصل کریں۔ چارج سنبھالنے کے ساتھ ہی اکادمی کے سکریٹری زہیر بن صغیر نے اکادمی کا معائنہ کیا اور سبھی کو ہدایت دی کہ اکادمی اور اردو زبان کے لئے سبھی مل کر کام کریں۔

قابل ذکر ہے کہ اتر پردیش اردو اکادمی کی سابقہ چیئرمین آصفہ زمانی کی مدت کار جنوری 2020 میں ختم ہوئی تھی، جس کے بعد سے ابھی تک چیئرمین کی تقرری نہیں ہوئی، جس سے کمیٹی کی تشکیل بھی نہیں ہوپائی۔ یہی وجہ ہے کہ اترپردیش اردو اکادمی کے ایوارڈ سمیت دیگر کام متاثر ہو رہے تھے۔