اترپردیش میں اوقاف املاک کی جانچ کی ہدایت لکھنو:اترپردیش حج کمیٹی کے چیئرمین محسن رضا نے رد عمل کا اظہار کرتے ہوئے کہا کہ ریاست کے الگ الگ علاقوں سے عوام کی شکایات آرہی تھیں کہ بورڈ میں کھلی بدعنوانی ہو رہی ہے۔ جب وزیراعلیٰ یوگی سے ملاقات ہوئی تو انہوں نے اس سلسلے میں تفصیلی بات کی۔ اب جانچ کے لئے ہدایت دے دی گئی ہے جس کا ہم تہہ دل سے شکریہ ادا کرتے ہیں۔ انہوں نے کہا کہ اوقاف جائیداد مسلمانوں کی فلاح و بہبود کے لئے ہوتی ہیں لیکن موجودہ وقت میں اوقاف کے تعلق سے بدعنوانی عروج پر ہے۔ جانچ ہونے کے بعد بہت سی چیزیں واضح ہوجائیں گی کہ کتنے بڑے پیمانے پر بدعنوانی ہوئی ہے۔
یہ بھی پڑھیں:Aap on Yogi Govt یوگی آدتیہ ناتھ کا بلڈوزر صرف غریب عوام کے گھروں پر چل رہا ہے، عام آدمی پارٹی
ان سے جب یہ سوال کیا گیا کہ جب وہ خود جب اوقاف املاک کے وزیر مملکت تھے، اس وقت ان بدعنوانیوں کو کیوں دور نہیں کیا اور وزیر اعلیٰ سے ملاقات کرکے جانچ کی سفارش کیوں نہیں کی تھی۔ اس سوال کا واضح جواب نہ دیتے ہوئے انہوں نے کہا کہ وقف املاک کی لڑائی کئی علماء لڑ رہے تھے۔ اس بات پر بھی غور کیا جا رہا تھا کہ جانچ کے لئے سی بی آئی کی سفارش کی جائے یا کسی دوسرے جانچ ایجنسی کو دیا جائے۔ اس پر کافی عرصے تک غور و فکر کی گئی۔ انہوں نے کہاکہ پچھلی باتوں پر توجہ دینے سے بہتر ہے کہ اس میں سدھار لایا جائے۔ اب شکایت کا سلسلہ تیز ہوگیا ہے جس کی وجہ سے جانچ کی ہدایت دی گئی ہے اور امید ہے کی جانچ کے بعد بڑے معاملات کا انکشاف ہوگا۔
