اترپردیش میں خوردنی تیل کی ذخیرہ اندوزی کی حد مقرر

اترپردیش حکومت کی جانب سے خوردنی تیل کی قیمتوں پرکنٹرول پانے کے لیے اس کی ذخیرہ اندوزی کی حد مقرر کی گئی ہے۔ سرکاری ترجمان کا کہنا ہے اسٹاک کی حد کا اثر اتر پردیش میں جلد ہی نظر آئے گا۔

اترپردیش حکومت نے تہوار کے موسم میں خوردنی تیل کی قلت کو کم کرنے کی کوشش کے تحت خوردنی تیل کی ذخیرہ اندوزی کی حد مقرر کی ہے۔ ایک سرکاری ترجمان نے کہا کہ اتر پردیش اس طرح کے اعلان کرنے والی پہلی ریاست ہے۔ اس سلسلے میں اکتوبر کے شروعاتی دنوں میں ہی ایک نوٹیفکیشن جاری کیا گیا تھا جس میں مختلف اسٹیک ہولڈرز کے لیے 1-25 ٹن کی حد میں اسٹاک کی حد مقرر کی گئی تھی۔

ترجمان نے کہاکہ "8 ستمبر کو مرکز نے تمام ریاستوں کو خط لکھا اور ان سے کہا کہ وہ مصنوعی قلت اور خوردنی تیل کی بلند قیمتوں کے خلاف کارروائی کریں۔ اتر پردیش حکومت نے مختلف زمروں جیسے کہ خوردہ فروش، تھوک فروش کو مطلع کرتے ہوئے ذخیرہ کی حد مقرر کی ہے۔'

دوسری ریاستیں جیسے ہریانہ، گجرات اور راجستھان بھی اسی طرح کا نوٹیفکیشن جاری کرنے والے ہیں۔

گزشتہ ہفتے وزیر اعلی یوگی آدتیہ ناتھ نے عہدیداروں کو ہدایت دی کہ وہ منافع خوری، ذخیرہ اندوزی اور کھانے پینے کی اشیاء پر مصنوعی قیمتوں میں اضافے میں ملوث افراد کے خلاف کارروائی کریں تاکہ لوگوں کو تہوار کے موسم میں مناسب نرخوں پر خوراک اور خوردنی تیل مل سکے۔'

ایک سرکاری ترجمان نے کہا کہ اسٹاک کی حد کا اثر اتر پردیش میں جلد ہی نظر آئے گا۔'

انہوں نے کہاکہ "کورونا کی وجہ سے تیل کی پیداوار میں کمی آئی تھی، تاہم اب حالات معمول پر آرہے ہیں، ہمیں امید ہے کہ قیمتیں بھی نیچے آئیں گی۔ اسٹاک کی حد کا اثر جلد ہی پورے اتر پردیش کے بازاروں میں نظر آئے گا۔'