بارہ بنکی : ہاتھرس واقعہ کے بعد خواتین کے تحفظ کے لیے حکومت مستعد

ہاتھرس مبینہ جنسی زیادتی معاملے کے بعد اتر پردیش حکومت خواتین کے تحفظ کے تئیں مستعد ہو گئی ہے اور خواتین میں اعتماد پیدا کرنے کے لیے محکمہ خواتین بہبود کی جانب سے 'ناری شکتی مہم' کا آغاز کیا جائے گا۔

اتر پردیش حکومت کی جانب سے شروع کی جانے والی 'ناری شکتی مہم' نوراتری کے پہلے روز 17 اکتوبر سے شروع ہوگی جو آئندہ برس نوراتری یعنی اپریل 2021 تک جاری رہے گی۔

اس مہم کے تحت بارہ بنکی ضلع کے تمام بلاکس کے آنگن واڑی مراکز پر خواتین کے تحفظ اور ان کے لیے چلائی جارہی تمام اسکیمز کے تعلق سے خواتین کو بیدار کیا جائے گا۔

اس بیداری مہم کا مقصد خواتین کو ان کے حقوق اور قوانین کے تئیں بیدار کرنا ہے کیوں کہ زیادہ تر خواتین کو اپنے حقوق، اسکیمات اور قانون کے بارے میں علم تو ہے لیکن ان کا انہیں کب کہاں اور کیسے استعمال کرنا ہے اس میں وہ پیچھے رہ جاتی ہیں اس لیے یہ بیداری مہم چلائی جا رہی ہے تاکہ انہیں تمام مسائل کے تعلق سے بیدار کیا جا سکے۔