اترپردیش پولیس کے انسداد دہشت گردی دستےATS نے آئندہ 15اگست کو یوم آزادی کے موقع پر مبینہ طور سے دہشت گردانہ حملہ کرنے کے مقصد سے بلاسٹ کرنے کا منصوبہ بنانے کے دعوی کے ساتھ ایک شخص کو اعظم گڑھ سے گرفتار کیا ہے۔ یوپی اے ٹی ایس کی جانب سے جاری بیان میں دعوی کیا گیا ہے کہ پکڑا گیا شخص اعظم گڑھ باشندہ صباح الدین اعظمی ولد ظفر اعظمی آئی ایس آئی ایس سے وابستہ ہے۔
اے ٹی ایس نے یوم آزادی سے قبل اسے ایک بڑی سازش کا پردہ فاش کرنے میں ملی کامیابی بتاتے ہوئے بیان میں دعوی کیا کہ اعظمی آئی ایس آئی ایس کے ریکروٹر سے براہ راست رابطے میں تھا ۔ اس کے مطابق ریاست کےڈائرکٹر جنرل آف پولیس کی ہدایت و ایڈیشنل ڈائریکٹر جنرل آف پولیس(نظم ونسق)مشاہدے میں اے ٹی ایس کے ایڈیشنل ڈائرکٹر جنرل آف پولیس نے یوم آزادی کے موقع پر حساسیت کو دیکھتے ہوئے برتی جارہی اضافی مستعدی کے تحت کی گئی کاروائی کے دوران اعظمی کو پکڑنے میں کامیابی حاصل کی ہے۔
اس کے تحت ہی اے ٹی ایس کو خفیہ اطلاع ملی تھی کہ ضلع اعظم گڑھ کے امیلو مبارک پور علاقے میں ایک شخص اپنے ساتھیوں کے ساتھ مل کر آئی ایس آئی ایس کے نظریہ کو سوشل میڈیا سمیت دیگر ذرائع سے مشتہر کررہا ہے۔ اسے گرفتار کر اے ٹی ایس دفتر میں پوچھ گچھ کے دوران اس کے موبائل فون کی تلاشی لینے پر آئی ایس آئی ایس کے ٹیلی گرام چینل سے اس کے جڑے ہونے کی بات اجاگر ہوئی۔ آئی ایس آئی ایس اس چینل کا استعمال نوجوانوں کو جہاد سے جوڑنے کے مقصد سے ان کا 'برین واش'کرنے میں کرتا ہے۔