Fake Currency Case جعلی نوٹ سپلائی معاملہ، دیپک منڈل کے بعد عالمگیر شیخ کی گرفتاری

یوپی اے ٹی ایس نے پاکستان میں چھپے جعلی بھارتی نوٹ ہندوستان میں سپلائی کرنے کے الزام میں عالمگیر شیخ نام کے شخص کو گرفتار کیا ہے۔ اس سے قبل اس معاملے میں دیپک منڈل نام کے شخص کو گرفتار کیا گیا تھا۔ ملزم مغربی بنگال کا رہنے والا ہے۔

لکھنؤ: اترپردیش میں جعلی نوٹ سپلائی کرنے کے الزام میں یوپی اے ٹی ایس نے مغربی بنگال سے ایک ملزم کو گرفتار کیا ہے۔ گرفتار ملزم کا نام عالمگیر شیخ عرف لٹو شیخ ہے جو وشنو نگر مالدہ مغربی بنگال کا رہنے والا ہے۔ عالمگیر پر 25 ہزار کا انعام تھا۔ یوپی اے ٹی ایس نے جمعہ کو ملزم عالمگیر شیخ کو مغربی بنگال سے گرفتار کیا ہے۔ گرفتار ملزم کو تفتیش کے بعد عدالت میں پیش کیا گیا۔

یوپی اے ٹی ایس کا الزام ہے کہ گرفتار ملزم عالمگیر شیخ پاکستان میں چھپنے والی غیر قانونی بھارتی کرنسی کو بنگال کے راستے اتر پردیش لاتا تھا۔ اے ٹی ایس کے مطابق ان جعلی نوٹوں پر واٹر مارک اور آر بی آئی کی پٹی لگی تھی جو بھارتی نوٹوں کی طرح دکھائی دیتی تھیں۔ پاکستان میں چھپی یہ غیر قانونی کرنسی بنگلہ دیش کے راستے مغربی بنگال لائی گئی جس کے بعد یہ کرنسی اتر پردیش سمیت بھارت کی دیگر ریاستوں میں سپلائی کی گئی۔ پولیس کا الزام ہے کہ عالمگیر اس کام میں اہم کردار ادا کرتا تھا۔

حال ہی میں یوپی اے ٹی ایس نے مالدہ مغربی بنگال سے ایک ملزم دیپک منڈل کو گرفتار کیا تھا جو جعلی نوٹ سپلائی کر رہا تھا۔ دیپک کے پاس سے ایک لاکھ کے جعلی نوٹ برآمد ہوئے۔ دیپک منڈل سے پوچھ گچھ میں عالمگیر شیخ کا نام سامنے آیا، جس کے بعد یوپی اے ٹی ایس عالمگیر شیخ کی تلاش میں تھی۔ عالمگیر کو گرفتار کرنے میں ناکامی کے بعد اس پر انعام کا اعلان کر دیا گیا۔ گذشتہ دنوں اے ٹی ایس نے عالمگیر کو گرفتار کر لیا۔ گرفتاری کے بعد ملزم کے خلاف پریاگ راج میں ایف آئی آر درج کی گئی ہے۔ اے ٹی ایس کے مطابق اس سے قبل گرفتار دیپک منڈل سے پوچھ گچھ میں کئی انکشافات ہوئے ہیں جن کی بنیاد پر کارروائی کی جا رہی ہے۔