اتر پردیش کے کانپور میں اتوار کو ووٹنگ کے دوران میئر پرمیلا پانڈے نے رازداری کے اصول کی مبینہ طور پر خلاف ورزی کی اور انہوں نے ووٹ ڈالتے وقت کی تصویر کو وائرل کردیا۔ انہوں نے ای وی ایم میں بی جے پی کو ووٹ دیتے ہوئے اپنی تصویر کو وائرل کیا۔ تصویر کے وائرل ہونے کے بعد الیکشن کمیشن نے اس کا نوٹس لیا اور ڈسٹرکٹ الیکشن آفیسر نیہا شرما کو اس معاملے میں کارروائی کرنے کا حکم دیا۔ بتادیں کہ میئرنے سول لائنز میں واقع ہڈسن پولنگ سینٹر میں ووٹ ڈالا۔ FIR Against Kanpur Mayor Pramila Pandey
کانپور کی ڈی ایم نیہا شرما نے اپنے ٹویٹر ہینڈل سے لکھا کہ کانپور کے ہڈسن اسکول پولنگ اسٹیشن پر پرمیلا پانڈے کی جانب سے ووٹنگ کی رازداری کی خلاف ورزی کے نتیجے میں ان کے خلاف متعلقہ دفعات کے تحت ایف آئی آر درج کی جارہی ہے۔
کانپور کی میئر پرمیلا پانڈے نے کانپور شہر کے ہڈسن پولنگ بوتھ پر اپنا ووٹ ڈالا۔ اس دوران پرمیلا پانڈے نے ای وی ایم میں ووٹ ڈالتے ہوئے ایک تصویر بھی شیئر کی ہے۔ تصویر میں صاف نظر آرہا ہے کہ وہ پارٹی کو ووٹ دے رہی ہیں۔ ووٹنگ کے دوران پرمیلا پانڈے کی تصویر سوشل میڈیا پر بھی تیزی سے وائرل ہو رہی ہے۔ ووٹنگ کے دوران رازداری کی خلاف ورزی کا حق کسی کو نہیں ہے۔ الیکشن کمیشن کی سخت ہدایات کے مطابق بوتھ کے اندر کوئی موبائل نہیں لے جایا جائے گا۔ عام لوگوں کو بوتھ تک موبائل لے جانے سے بھی روکا جا رہا ہے۔ اس کے باوجود میئر موبائل فون لے کر بوتھ کے اندر گئی اور ای وی ایم میں ووٹ ڈالتے وقت تصویر کھنچوائی۔