مظفرنگر: چھوٹے کاروباریوں کا دکان لگانے کی اجازت دینے کا مطالبہ

مظفرنگر میں جھانسی کی رانی چوک پر ٹھیلہ لگا کر سامان فروخت کرنے والے تاجروں نے اپنے مطالبات کے سلسلے میں ضلع کلکٹر سے ملاقات کی اور انہیں ایک میمورنڈم پیش کیا۔

اترپردیش کے ضلع مظفرنگر میں واقع جھانسی کی رانی چوک کے قریب دکان لگانے والے چھوٹے تاجروں نے اپنے مطالبات کے پیش نظر آج ضلع مجسٹریٹ سے ملاقات کی اور میمورینڈم پیش کیا۔

اس دوران انہوں نے ضلع مجسٹریٹ کو بتایا کہ جھانسی کی رانی چوک کے قریب ہم سب ٹھیلے پٹری پر سامان فروخت کر کے اپنی زندگی بسر کرتے تھے۔ لیکن گزشتہ دنوں چوک پر موجود پارک کی مرمت کا حوالہ دے کر ہم دکانداروں کو وہاں سے ہٹا دیا گیا اور کہا گیا کہ پارک کی مرمت ہونے کے بعد آپ سبھی کو یہاں دوبارہ بیٹھنے کی اجازت دی جائے گی، لیکن ایسا نہیں کیا گیا۔

اس کے سبب گزشتہ تین ماہ سے ہم تمام چھوٹے دکاندار بے روزگار ہیں جس سے ہمیں کافی مشکلات کا سامنا کرنا پڑ رہا ہے۔

انہوں نے کہا کہ ہماری حالت بد سے بدتر ہوگئی ہے۔ گھر میں چھوٹے بچے کھانہ مانگتے ہیں تو ہمارے پاس انہیں دلاسہ دینے کے علاوہ کچھ نہیں ہوتا۔ اس لئے ہم انتظامیہ سے گزارش کرتے ہیں کہ ہمیں چوک پر دکان لگانے کی اجازت دی جائے تاکہ ہم اپنے کنبے کا گزر بسر آسانی سے کر سکیں۔