نوئیڈا: 10 سالہ طالب علم کے قتل میں ملوث دو نابالغ گرفتار

گذشتہ برس نوئیڈا پولیس اسٹیشن سیکٹر 49 میں واقع گاؤں شرف آباد کے 10 سالہ طالب علم کو قتل کر کے زیر تعمیرعمارت میں دفن کر دیا گیا تھا ۔

اس قتل کے الزام میں نوئیڈا سیکٹر 49 پولیس نے دو نابالغ طلبا کو گرفتار کیا ہے۔

ڈپٹی کمشنر پولیس (زون اول) راجیش ایس نے بتایا کہ تھانہ سیکٹر 49 علاقہ کے ایک گاؤں کے 10 سالہ طالب علم کی لاش 11 اکتوبر 2020 کو ایک زیر تعمیر عمارت سے ملی تھی۔

انہوں نے بتایا کہ اس واقعہ کی تفتیش کرنے والے تھانہ سیکٹر 49 پولیس نے اطلاع کی بنیاد پر بچے کے قتل کے سلسلے میں دو نابالغ طلبا کو گرفتار کیا ہے۔

انہوں نے مزید بتایا کہ تفتیش کے دوران دونوں ملزمین نے پولیس کو بتایا کہ انہوں نے طالب علم کے ساتھ ایک بار زیادتی کی تھی اور واقعہ کے دن وہ ایک بار پھر طالب علم کے ساتھ یہی حرکت کر رہے تھے، اسی دوران طالب علم نے احتجاج کیا اور اپنے گھر بات بتانے کی بات کہی۔

راز فاش ہونے کے ڈر سے دونوں نابالغ بچوں نے اس کے گلے میں رسی کا پھندا ڈال کر مار دیا اور اس کی لاش کو کپڑے سے ڈھک کر اس کے اوپر مٹی اور اینٹ رکھ کر وہاں سے فرار ہو گئے تھے۔