کشی نگر:ریاست اترپردیش کے ضلع کشی نگر میں پولیس نے منگل کو دو منشیات اسمگلروں کو گرفتار کر کے ان کے قبضے سے 34 کلو گانجا برآمد کیا ہے۔ پولیس ذرائع نے بتایا کہ انچارج انسپکٹر سواٹ سشیل کمار شکلا اور انچارج انسپکٹر تمکوہی راج نیرج کمار کی قیادت میں پولیس ٹیم نے لتوا چٹی نہر کے نزدیک سے بین ریاستی گانجا اسمگلر اوسہر چودھری اور راکیش رام کو گرفتار کیا ہے۔ بہار کے مغربی چمپارن باشندہ اسمگلروں کے قبضے سے ایک کار میں چھپا کر رکھا گیا 34کلو غیر قانونی گانجا برآمد کیا ہے۔ پوچھ گچھ میں اسمگلروں نے بتایا کہ غیر قانونی گانجا اڑیسہ اور مغربی بنگال وغیرہ ریاستوں سے کم قیمتوں میں لاکر اترپردیش اور سرحد کے اضلاع میں زیادہ قیمت پر فروخت کر دیتے ہیں۔
واضح رہے کہ گذشتہ 3 اپریل کو پولیس ٹیم نے اتر پردیش کے بستی ضلع میں نشے کے خلاف آپریشن نشا مکت مہم شروع کی جس کے تحت ٹیم نے پانچ اسمگلروں کو 66 کلو گانجہ سمیت گرفتار کیا تھا۔ اس گینگ پر الزام ہے کہ نیپال سے گانجہ خرید کر ریاست کی مختلف ریاستوں میں بیچنے کی تیاری تھی۔ تبھی مخبر کی اطلاع پر بستی کی رودھولی پولیس نے بستی سدھارتھ نگر سرحد پر خصوصی چیکنگ آپریشن کے دوران اس گینگ کو 66 کلو گرام گانجے سمیت گرفتار کر لیا۔ ایس پی گوپال کرشنا چودھری نے پریس کانفرنس میں بتایا کہ ضلع میں منشیات کا کاروبار لگاتار بڑھنے لگا ہے جس کے تحت منشیات فروشوں کے خلاف کریک ڈاؤن کے لیے آپریشن نشا مکتی مہم مسلسل چلائی جا رہی ہے۔