ممبئی سے بنارس پہنچی ٹرین میں دو لاشیں ملنے سے سنسنی

اترپردیش کے بنارس ضلع میں ممبئی سے آئی شرامک اسپیشل ٹرین میں دو نوجوانوں کی لاشیں ملی ہیں۔

لوک مان تلک ٹرمینل سے مرواڈیہہ اسٹیشن پر صبح 8 بجے پہنچی اس ٹرین میں تقریبا 1039 مزدور سوار تھے۔ دو فوت شدہ مزدوروں میں سے ایک جونپور کا رہنے والا ہے جبکہ دوسرے کے بارے میں ابھی معلومات نہیں حاصل کی جا سکی ہے۔ اسٹیشن ماسٹر ارون کمار کا کہنا ہے کہ جب یہ ٹرین صبح آٹھ بجے مرواڈیہہ اسٹیشن پر پہنچی تو لوگوں سے اطلاع ملی کہ دو کوچ میں دو لوگوں کی موت ہوچکی ہے۔

انہوں نے کہا کہ اس کی اطلاع میں نے ضلع انتظامیہ کو دی۔ اس کے بعد موقع پر میڈیکل ٹیم کو بھیج کر جانچ کرائی گئی ہے۔ اہل خانہ کے مطابق ہلاک شدہ جون پور کا رہنے والا ہے کئی برس سے بیمار تھا اور وہ معذور بھی تھا۔ ڈاکٹروں نے اسے گھر جانے کی صلاح دی تھی اور وہ گھر آ رہا تھا اسی دوران پریاگراج اسٹیشن پر اس کی موت ہوگئی۔