علی گڑھ: عید کے روز بازار کھولنے کے لیے تاجروں نے ڈی ایم سے کی اپیل

علیگڑھ عامر نشاں بازار کے تاجروں نے معصوم بچوں کے لیے عید کی خریداری اور دیگر ضروری اشیاء کی خریداری کے لیے عید کے دن بازار کھولنے کی علی گڑھ ڈی ایم سے اپیل کی ہے۔

کورونا وبا کی دوسری لہر کے سبب لاک ڈاؤن نافذ ہے، جس کی وجہ سے سبھی بازار بند ہیں۔ رمضان المبارک کے مہینے میں بھی رونق دیکھنے کو نہیں ملی۔

ایسے میں 14 مئی کو عید الفطر ہے جس کے مدنظر علی گڑھ عامر نشاں بازار کے صدر نعیم احمد نے علی گڑھ ڈی ایم سے اپیل کی ہے کہ ضروری سامان اور معصوم بچوں کے کپڑے جوتے کے لئے بازار کھولنے کی اجازت دی جائے۔

وہیں نعیم احمد نے کہا جب شراب کی دکانوں کو کھولنے کی اجازت ہے تو عید کی ضروری خریداری اور معصوم بچوں کے کپڑوں کے لئے ایک دن کے لیے بازار کھولنے کی اجازت دی جائے۔

نعیم احمد نے کہا "علی گڑھ عامر نشاں کے تمام تاجروں کی جانب سے علی گڑھ ڈی ایم سے اپیل کرتا ہوں جو سبھی دوکانیں بند پڑی ہوئی ہیں جیسے جوتا، چپل، کپڑے، برتن، وغیرہ کی سبھی دکانیں بند ہیں جس سے ہم اور ہمارے جو خریدار بہت پریشان ہیں جن کو کچھ ضروری سامان چاہیے۔

انہوں نے کہا کہ ہم جانتے ہیں کہ حالات کس طرح کے چل رہے ہیں، عید منانے کا دل نہیں ہے اور نہ ہی دل کر رہا ہے کیونکہ ملک کے اندر جتنی اموات ہوئی ان کو دیکھ کر دل دکھتا ہے۔ لیکن گھروں میں جو معصوم بچے ہیں ان کو ملک کے حالات نہیں معلوم ان کو صرف اتنا معلوم ہے کہ عید ہے اور ہمارے نئے نئے کپڑے اور جوتے آئیں گے جو بازار بند ہونے سے ان کو نہیں مل پارہے ہیں۔

لیکن افسوس اس بات کا ہے کہ جن ضروری سامان کی لوگوں کو ضرورت پڑ رہی ہے جیسے کپڑے، برتن، جوتے وغیرہ ان کی دکانیں بند ہیں اور جن کی ضرورت نہیں ہے جیسے شراب کے ٹھیکہ کھول دیے گئے ہیں۔ شراب کی دکانوں پر لمبی لمبی لائن لگی ہوئی ہیں وہاں کوئی کورونا نہیں آرہا وہاں کوئی بیماری نہیں آرہی۔

نعیم احمد نے علی گڑھ ڈی ایم سے اپیل کی کہ عید کے روز ہمیں دکانیں کھولنے کی اجازت دی جائے تو بہت مہربانی ہوگی۔