اترپردیش: کاس گنج میں ٹرپل مرڈر

کوتوالی تھانہ علاقہ میں واقع ہوڈل پور میں ایک ہی کنبے کے تین افراد کا گولی مار کر قتل، جبکہ ایک شخص شدید طور پر خمی ہو گیا ہے۔

ریاست اترپردیش کے کاس گنج کے کوتوالی تھانہ علاقہ میں واقع ہوڈل پور میں اتوار کے روز نامعلوم شرپسندوں نے ایک خاندان کے تین افراد کو گولی مار کر ہلاک کردیا۔

ہلاک ہونے والے افراد کی شناخت ابھی نہیں ہوسکی ہے۔ تاہم پولیس نے تصدیق کی ہے کہ ہلاک ہونے والے تمام افراد ایک ہی خاندان کے ہیں۔

ذرائع کے مطابق 'یہ واقعہ آج شام کو اس وقت پیش آیا جب کنبہ کے افراد اپنے کام میں مصروف تھے۔ اچانک کچھ نامعلوم شرپسندوں نے گھر میں گھس کر گھر والوں سے جھگڑنا شروع کر دیا۔'

اسی دوران شرپسند گھر کے چاروں افراد پر گولیاں چلانے لگے جس وجہ سے تین کی موقع پر ہی موت ہو گئی۔ حملہ کرنے کے بعد شرپسند موقع سے فرار ہوگئے۔

وہیں گولیوں کی آوازیں سننے کے بعد کچھ مقامی افراد موقع پر پہنچے اور دیکھا کہ تین افراد کی موت ہو چکی ہے اور ایک شخص شدید طور پر زخمی ہو گیا ہے۔

مقامی لوگوں نے فوری طور پر زخمی شخص کو قریبی اسپتال پہنچایا۔ زخمی شخص کی حالت تشویشناک ہونے کے سبب اسے کاس گنج ڈی ایچ ایچ منتقل کر دیا گیا ہے۔

ذرائع نے بتایا کہ 'زخمی شخص کی حالت نازک بتائی جارہی ہے۔'

وہیں اطلاع ملتے ہی کاس گنج پولیس موقع پر پہنچ کر اس معاملے کی تفتیش کر رہی ہے۔ تاہم ابھی تک اس قتل کی وجہ کا پتہ نہیں چل سکا ہے۔

ابتدائی تفتیش میں قتل کے پیچھے ماضی کی دشمنی کا سبب بتایا جا رہا ہے۔