بے قابو کار دیوار سے ٹکرائی، 3 افراد ہلاک

ضلع سیتاپور میں برات سے واپس لوٹ رہی ایک کار دیوار سے ٹکرا گئی، جس میں تین افراد کی موت ہوگئی، جبکہ دو افراد شدید زخمی ہو گئے جنہیں ہسپتال میں داخل کرایا گیا ہے۔

ریاست اترپردیش کے ضلع سیتا پور میں واقع تال گاؤں تھانہ علاقہ میں ایک سڑک حادثہ میں تین کی موت جبکہ دو افراد شدید زخمی ہو گئے، بتایا جارہا ہے کہ سبھی افراد برات میں شامل ہونے کے بعد گھر لوٹ رہے تھے، تبھی بے قابو کار دیوار سے ٹکرا گئی۔ زخمیوں کو ہسپتال میں داخل کرایا گیا ہے، جبکہ ایک بچی اس حادثے میں بحفاظت زندہ بچ گئی۔

بے قابو کار دیوار سے ٹکرائی، 3 افراد ہلاک

یہ سڑک حادثہ بسواں۔لہر پور روڈ پر تالگاؤں پولیس اسٹیشن کے قریب رات کے وقت پیش آیا۔
صدر پور تھانہ علاقے کے تحت جہانگیر آباد قصبے کے لوگ ایک برات میں شرکت کے لیے گئے تھے۔
واپسی کے دوران انکی کار بے قابو ہوکر ایک گھر کی دیوار سے ٹکرا گئی۔ ٹکر اتنا زوردار تھا کہ گاڑی کے پرخچے اڑ گئے۔

گاڑی میں سوار تنویر، توصیف اور عارف کی موت ہو گئی۔ حادثہ میں زخمی انل پوروال کو لکھنئو بھیج دیا گیا، جس کے دونوں پیر فریکچر ہو گیا ہے، وہیں حادثہ میں اینل سونی کو بھی شدید چوٹ آئی ہے جس کا علاج سیتا پور ہسپتال میں چل رہا ہے۔