Junaid Nasir Murder Case جنید اور ناصر کے قاتلوں کو پھانسی کی سزا کا مطالبہ

رکن اسمبلی ضیاء الرحمن برق کا کہنا ہے کہ باندہ میں مذہبی مقامات پر حملہ کرنا ہو یا کانپور میں ایک خاتون کا اپنی بیٹی کے ساتھ زندہ جل جانے کا معاملہ ہو یا میوات میں مسلم نوجوانوں کو زندہ جلانے کا واقعہ ہو یہ تمام چیزیں اس بات کی جانب اشارہ کررہی ہیں کہ مسلمانوں کے ساتھ ناانصافی ہورہی ہے۔

ریاست اتر پردیش کے ضلع باندہ میں وی ایچ پی اور بجرنگ دل کے کارکنان کے ذریعہ مسجد پر حملہ کیا گیا تھا جس پر مرادآباد آباد سے سماجوادی پارٹی کے رکن اسمبلی ضیاء الرحمن برق نے حکومت پر سخت تنقید کرتے ہوئے اس معاملے میں ملوث افراد کے خلاف ملک مخالف دفعات کے تحت کاروائی کرنے کا مطالبہ کیا ہے۔

انہوں نے کہا کہ جس طریقے سے بی جے پی قانون کے راج کا دعوی کرتی ہے ان واقعات سے ان کے دعوے کی پول کھل گئی ہے۔ انہوں نے کہا کہ میوا ت میں جنید اور ناصر کو زندہ جلا کر قتل کردیا گیا اس پر نہ صرف وہاں کی حکومت اور پولیس انتظامیہ ذمہ دار ہے بلکہ' گاؤ رکچھا' کے نام پر عوام کے مابین خوف و ہراس پیدا کرنے کی کوشش کی جا رہی ہے۔ انہوں نے کہا کہ ان مجرموں کے خلاف یو اے پی اے کے تحت کاروائی کی جائے تاکہ ملک میں اقلیتوں کا حکومت پر اعتماد برقرار رہے۔

انہوں نے کہا کہ ان واقعات کی جتنی بھی مذمت کی جائے کم ہے ،حکومت کو فوری طور پر ان کے خلاف سخت کاروائی کرکے یہ پیغام دینا چاہیے کہ مستقبل میں اس طرح کے حرکت برداشت نہیں کی جائے گی۔ انہوں نے کہا کہ ناصر اور جنید کے قاتلوں کو جھانسی کی سزا دی جائے تاکہ ان کے اہل خانہ کو انصاف مل سکے۔