رامپور کے عظیم نگر تھانہ علاقے کے دوکنپوری ٹانڈہ گاؤں میں ایک عجیب و غریب واقعہ پیش آیا ہے۔ اپنی ناراض بیوی کو بلانے کے لئے داماد جب اپنی سسرال گیا تو کسی بات پر نا اتفاقی ہونے پر سسرال والوں نے داماد کو چارپائی پر لیٹا کر باندھ دیا۔
سسرال آئے داماد کو سسرال والوں نے چارپائی سے باندھ ڈالا اتراکھنڈ کے مہیش پورہ کے رہائشی ایک شخص کی شادی تقریباً دو سال پہلے دوکنپوری ٹانڈہ سے ہوئی تھی۔
مقامی لوگوں کا کہنا ہے کہ 15 دن قبل متاثر شخص کی بیوی کسی بات پر ناراض ہو گئی اور اپنے میکے چلی آئی۔ بیوی کو واپس بلانے متاثر شخص داوکنپوری ٹانڈہ آیا تھا۔ شخص اپنی بیوی کو اپنے ساتھ واپس لے جانے پر بضد تھا لیکن سسرال والے اسے بھیجنے کو تیار نہیں تھے۔
اسی بات کو لیکر اس کی سسرال والوں سے کہا سنی ہونے لگی۔ معاملے نے طول پکڑا تو سسرال والوں نے اپنے داماد کو چارپائی سے باندھ دیا۔ رسی سے بندھے پڑے داماد کو دیکھنے کے لئے آس پڑوس کے لوگوں کی بھیڑ لگ گئی۔
یہ بھی پڑھیں: رامپور: پانچ کروڑ کی نشیلی دوائیاں برآمد، 11 گرفتار
تقریباً دو گھنٹے بعد معاملے کی اطلاع کسی پڑوسی نے پولیس کو دی۔ کچھ دیر بعد جب پولیس کی گاڑی کا سائرن بجا تو سسرال والوں نے داماد کو چھوڑ دیا۔ موقع دیکھ کر شخص گاؤں سے فرار ہو گیا۔ حالانکہ پولیس نے معاملے کی جانکاری سے انکار کیا ہے۔
