بارہ بنکی: مذہبی پابندی ہٹانے کے لیے آل انڈیا پسماندہ مسلم محاذ مہم چلائے گی

آل انڈیا پسماندہ مسلم محاذ دفعہ 341 کے تحت دلت اور مسلمانوں کے ریزرویشن پر عائد پابندی کو ہٹانے کے لئے بیداری مہم چلائے گی۔

آل انڈیا پسماندہ مسلم محاذ دفعہ 341 کے تحت دلت اور مسلمانوں کے ریزرویشن پر عائد پابندی کو ہٹانے کے لئے بیداری مہم چلائے گی۔ اس کے تحت ریاست کے تمام اضلاع میں محاذ کے کارکنان مختلف پروگرامز کریں گے۔ اس کے بعد تمام اضلاع میں 10 اگست کو ضلع مجسٹریٹ کے ذریعہ صدر جمہوریہ کو مخاطب میمورنڈم بھی پیش کیا جائے گا۔

ریاست اتر پردیش کے بارہ بنکی میں یہ معلومات آل انڈیا پسماندہ مسلم محاذ کے ریاستی صدر وسیم رائین اور محاذ کے قومی جنرل سیکرٹری وقار احمد نے دی۔ وسیم رائین نے بتایا کہ 10 اگست 1950 کو کانگریس کی اس وقت کی حکومت میں ایک سازش کے تحت اقلیتی طبقے کی پسماندہ ذاتوں کو ریزرویشن کے مفاد سے محروم کر دیا گیا تھا۔

کچھ برس بعد سکھوں اور دیگر پسماندہ طبقات کو اس میں شامل کر لیا گیا، لیکن مسلم آج بھی اس کے مفاد سے دور ہیں۔ محاذ کا مرکزی حکومت سے مطالبہ ہے کہ اگر وہ سب کا ساتھ اور سب کی ترقی کی بات کرتے ہیں تو 341 کے تحت پسماندہ مسلمانوں کے ریزرویشن پر عائد پابندی کو ہٹایا جائے۔

انہوں نے کہا کہ حکومت نے جس طرح تمام بڑے قوانین بنائے ہیں اسلئے ہمیں امید ہے کہ حکومت اس مسئلے پر ضرور غور کرے گی۔'