Urdu PhD In AMU ای ٹی وی بھارت کی خبر کا اثر،شعبہ اردو میں پی ایچ ڈی میں داخلہ کے لیے دس سیٹیں نکالی

علیگڑھ مسلم یونیورسٹی (اے ایم یو) انتظامیہ نے ای ٹی وی بھارت پر خبریں شائع ہونے کے بعد شعبہ اردو میں پی ایچ ڈی میں داخلہ کے لیے دس سیٹیں نکال دی ہیں۔

علیگڑھ :دنیا کے سب سے بڑے شعبہ اردو علیگڑھ مسلم یونیورسٹی میں یونیورسٹی انتظامیہ کی جانب سے تعلیمی سال 2022-23 میں پی ایچ ڈی میں داخلے کے لئے ایک بھی سیٹ نہیں نکالی تھی جس کو لے کر نہ صرف داخلے کے خواہشمند طلبہ بلکہ محبان اردو فکر مند تھے۔پی ایچ ڈی میں داخلہ لینے والے خواہش مند طلباء حیران وپریشان ہیں۔ اردو میں پی ایچ ڈی میں داخلے کی جو طلبہ تمنا لیے ہوئے تھے انہیں دھچکہ لگا تھا.

اسی لئے اے ایم یو کورٹ کے سابق رکن عبدالوحید نے وائس چانسلر کے نام ایک خط بھی لکھا تھا جس میں جلد سے جلد اور زیادہ سے زیادہ پی ایچ ڈی میں داخلے کے لئے سیٹیں بحال کرنے کا مطالبہ کیا تھا اور اردو کے لئے داخلے کے خواہشمند طلباء سمیت محبان اردو یونیورسٹی انتظامیہ سے جمہوری طریقہ سے اردو کے حق کے لئے لڑائی لڑنے کا بھی اعلان کیا تھا۔ جس سے متعلق ای ٹی وی بھارت اردو نے 24 جلائی سے 1 اگست تک چار مختلف خبریں شائع کی تھی جس کے بعد یونیورسٹی انتظامیہ کی جانب سے جلد سیٹیں نکالنے کی یقین دہانی کروائی گئی تھی۔ گزشتہ روز یونیورسٹی کنٹرول دفتر کی جانب سے ایک نوٹس جاری کیا گیا ہے جس میں شعبہ اردو میں پی ایچ ڈی داخلے کے لئے دس سیٹیں نکالی گئی ہے۔

اردو میں پی ایچ ڈی: داخلے کے لئے آن لائن درخواست کی تاریخ 31 اگست ہے جس کی فیس 750 ہے۔ لیٹ فیس کے ساتھ 6 ستمبر 2023 ہے۔ پی ایچ ڈی اردو کے لئے دس سیٹوں کی بحالی پر عبدالوحید نے خوشی کا اظہار کیا اور پی ایچ ڈی کی سیٹوں سے متعلق، اردو کے حق میں مستقبل خبر شائع کرنے پر ای ٹی وی بھارت کا شکر ادا کیا۔

اسسٹنٹ کنٹرول فیصل فرید نے بتایا اردو پی ایچ ڈی میں داخلہ کے لیے آن لائن فارم بھرنے کی آخری تاریخ 31 اگست ہے اور داخلے سے متعلق تمام تفصیلات اے ایم یو کنٹرولر کی ویب سائٹ
www.amucontrollerexam.com پر موجود ہے

تاریخ شاہد ہے یہ وہ زبان ہے جس نے انقلاب زندہ باد کا نعرہ دئے کر برطانوی حکومت کو اندر سے ہلا دیا تھا۔ اس زبان میں سرسید کا خون جگر بھی شامل، غالب اور میر یادیں ہیں، انیس کا درد بھی ہے، اردوزبان، علی گڑھ مسلم یو نیورسٹی کے قیام میں بھی شامل رہیں۔ جس چمن کو اس نے سجایا اس چمن سے اسکو رفتہ رفتہ بے گانہ بنایا جا رہا ہے علی گڑھ مسلم یونیورسٹی انتظامیہ پر مستقل اردو کو نظر انداز کرنے کا الزام لگتا آرہا ہے، لیکن ہر بار اے ایم یو انتظامیہ نے سختی سے اس الزام کو مسترد کرتی آرہی ہے۔

اپنی مثال آپ علی مسلم یونیورسٹی کا شعبہ اردو دنیا کا سب سے بڑا اردو زبان کا شعبہ ہے۔ اس شعبہ سے اردو زبان کے متعدد آفتاب و ماہتاب ادب کے آسمان کو زینت بخش چکے ہیں اور دانش گاہ کی عظمت کو دوبالا کر چکے ہیں۔