ہمارے اسکول مزید بند نہ کئے جائیں، طلبا کا حکومت سے مطالبہ

ریاست اترپردیش میں کورونا کے بڑھتے معاملوں کے پیش نظر حکومت کی جانب سے درجہ ایک سے 12 تک کے اسکولز 11 اپریل تک کے لئے دوبارہ بند کر دیے گئے ہیں۔

کورونا کے پھیلاؤ کو دیکھتے ہوئے اسکول کی تعطیلات میں مزید اضافہ کے بھی امکانات ہیں۔ 10 ماہ بعد کھلے اسکولز کو دوبارہ بند کئے جانے کے فیصلے پر رامپور میں خصوصی طور پر پرائمری اسکولز کے طلبا حکومت سے مطالبہ کر رہے ہیں کہ کورونا وائرس سے بچنے کے لئے حکومت اسکول بند نہ کرے بلکہ کوئی ایسا لائحہ عمل اختیار کرے جس سے طلبا کی تعلیم بھی متاثر نہ ہو اور مہلک وباء کورونا سے بھی محفوظ رہیں۔

کورونا ویکسین آجانے کے بعد احتیاطی تدابیر اختیار کرتے ہوئے گذشتہ دنوں تقریباً 10 ماہ بعد اسکولز کو کھولا گیا تھا۔ ابھی پورے طور پر نہ تو اسکولز میں تعلیمی سرگرمیاں معمول پر آ سکی تھیں اور نہ ہی نئے داخلہ لینے والے طلبا کی خاطر خواہ تعداد نظر آ رہی تھی لیکن ویکسینیشن کے دور میں ہی اچانک کورونا معاملوں کی رپورٹز سامنے آنے لگیں۔

ایک مرتبہ پھر کورونا پازیٹیو معاملوں میں تیزی آتے دیکھ کر اسکولوں کو 11 اپریل تک بند کر دیا گیا ہے۔ ایسے میں مسلسل اسکول بند رہنے سے پرائمری اسکولز کے طلبا اب حکومت سے اسکول کھولے جانے کی گزارش کرنے لگے ہیں۔

وہیں جونیئر اسکول کے درجہ چھ اور درجہ سات کے طلبا و طالبات اسکول کھولے جانے کا مطالبہ کرتے ہوئے کہتے ہیں کہ ان کے والدین کے مالی حالات اتنے اچھے نہیں ہیں کہ وہ آن لائن تعلیم کے لئے اسمارٹ فون خرید سکیں۔ اس لئے سوشل ڈسٹنسنگ کا اہتمام کرتے ہوئے ان کے اسکولز میں تعلیم کا سلسلہ جاری کیا جائے۔

فی الحال 11 اپریل تک اسکول بند کرنے کے احکامات ہیں لیکن جس تیزی سے کورونا کی دوسری لہر میں پازیٹیو مریضوں کی تعداد میں اضافہ ہو رہا ہے، اب اس کو دیکھ کر یہ کہنا مشکل ہو رہا ہے کہ کیا 11 اپریل تک بھی اسکولز کھل سکیں گے یا نہیں۔ اس لئے طلبا اور ان کے سرپرستوں کی نگاہیں اب اس بات پر ٹکی ہوئی ہیں کہ حکومت اسکولز کو مزید بند رکھنے کا فیصلہ کرتی ہے یا کچھ ایسی تدابیر اختیار کرتی ہے جس سے کورونا سے بھی بچاؤ ہو سکے اور طلبا کا اسکولز میں تعلیم کا سلسلہ بھی بند نہ ہو۔