جونپور: 'شری گنپتی پوجا مہا سمیتی' ہندو۔ مسلم اتحاد کی مثال

اتر پردیش کے ضلع جونپور میں ہند و مسلم اتحاد کی مثال پیش کرنے والی تنظیم شری گنپتی پوجا مہا سمیتی ٹرسٹ کی جانب سے ایک اہم میٹنگ کا انعقاد کیا گیا۔ اس میٹنگ میں ہندو مسلم دونوں مذاہب کے لوگوں نے شرکت کی۔

جونپور کے پنجابی مارکیٹ میں ہوئی ایک میٹنگ میں شری گنپتی پوجا مہا سمیتی ٹرسٹ کی نئی کمیٹی تشکیل دی گئی۔ خاص بات یہ ہے کہ اس کمیٹی میں مسلمانوں کو بھی سرپرستوں میں شامل کیا گیا ہے۔ اسی کے ساتھ کورونا وائرس کے دوران تنظیم کے ذریعہ کی گئی سماجی خدمات کے حوالے سے کارکنوں کی گلپوشی کر کے حوصلہ افزائی کی گئی۔

شری گنپتی پوجا مہا سمیتی ٹرسٹ کے سرپرست اعلیٰ پنڈت اودھیش چترویدی نے ای ٹی وی بھارت سے بات کرتے ہوئے بتایا کہ تنظیم کے جن سابق سرپرستوں کا انتقال ہوا ہے، ان کو خراجِ عقیدت پیش کرنے کے لئے اس پروگرام کا انعقاد کیا گیا تھا۔

انہوں نے بتایا کہ شری گنپتی پوجا مہا سمیتی ٹرسٹ میں تمام مذاہب کے لوگ شامل ہیں اور ہم ساتھ رہ کر کام کرتے ہیں۔

انہوں نے کہا کہ کوئی بھی مذہب ظلم و فساد نا اتفاقی کی بات نہیں کرتا ہے۔ ہر مذہب انسانیت کا پیغام دیتا ہے۔ ہم انسانیت، الفت ومحبت پر یقین رکھتے ہیں۔ ہمارا مذہب ہمارے گھروں میں ہے۔ ہم اپنے اپنے مذاہب پر عمل کرتے ہیں اور جب عوام میں آتے ہیں تو صرف ہم ایک انسان ہیں۔ اس لئے ہم انسانیت کا پیغام دیتے ہیں۔

آپ کو بتا دیں کہ شری گنپتی پوجا مہا سمیتی ٹرسٹ مذہبی پروگرامز کے علاوہ سماجی خدمات اور ہم آہنگی پیدا کرنے کے لئے مختلف پروگراموں کا وقتاً فوقتاً انعقاد کرتی رہتی ہے۔ اس تنظیم کو پورے ضلع میں اس کے طریقہ کار کی وجہ سے انفرادی حیثیت حاصل ہے۔