رامپور: حقیقت مائنارٹی تنظیم نے ضرورت مندوں میں گرم کپڑے تقسیم کئے

موسم سرما کے پیشِ نظر فلاحی تنظیم حقیقت مائنارٹی ویلفیئر سوسائٹی کی جانب سے آج ضرورت مندوں میں گرم کپڑے تقسیم کئے گئے۔

اترپردیش کے ضلع رامپور میں موسم سرما کی آمد کو دیکھتے ہوئے فلاحی تنظیم حقیقت مائنارٹی ویلفیئر سوسائٹی کی جانب سے آج ضرورت مندوں میں گرم کپڑے تقسیم کئے گئے۔

رامپور کی آسرا کالونی میں حقیقت مائنارٹی ویلفیئر سوسائٹی کے رضاکاروں کی جانب سے ایک کیمپ کا انعقاد کیا گیا، جہاں ضرورت مند افراد کے لیے گرم کپڑے تقسیم کئے جارہے ہیں۔

اس سلسلے میں حقیقت مائنارٹی ویلفیئر سوسائٹی کے صدر محمد ناظم نے بتایا کہ 'ہر سال ماہ ربیع الاول کی مناسبت سے اس کیمپ کا انعقاد کیا جاتا ہے اور ضرورت مند لوگوں میں گرم کپڑے تقسیم کئے جاتے ہیں۔

وہیں تنظیم کے رضاکار فہد احمد نے بتایا کہ ضرورتمندوں میں تقسیم کئے جارہے کپڑوں کو تنظیم کے کارکنان پہلے ان لوگوں سے گرم کپڑے حاصل کرتے ہیں جن کے پاس ضرورت سے زیادہ کپڑے ہوتے ہیں یا جو لوگ اپنی ضرورت پوری کرچکے ہوتے ہیں اور اس کا اچھا استعمال کرنا چاہتے ہیں۔

انہوں نے یہ بھی بتایا کہ رحمت کے پیغام کو عام کرنے کے مقصد سے یہ کیمپ لگائے جاتے ہیں اور بلا تفریق مذہب و ملت لوگوں میں کپڑے تقسیم کئے جاتے ہیں۔ یہی وجہ ہے کہ آسرا کالونی میں لگائے گئے اس کیمپ میں مسلمانوں کے ساتھ دیگر برادران وطن بھی گرم کپڑے حاصل کررہے ہیں۔