بریلی: ہیومن ٹریفکنگ کے جرم میں چھ افراد کو عمر قید کی سزا

بریلی کی ضلع عدالت نے دو نابالغ بہنوں کو اسمگلنگ کر کے بریلی لانے والے چھ ملزمین کو قصوروار قرار دیتے ہوئے، عمر قید کی سزا سنائی ہے۔ سزا پانے والوں میں دو خواتین بھی شامل ہیں۔

اب سے تقریباً آٹھ برس قبل پولیس نے دونوں بہنوں کو میرگنج تحصیل سے بازیاب کیا تھا۔ ضلع عدالت نے اس معاملے میں بریلی کی تحصیل میرگنج علاقے میں رہنے والے چورئی دلپتپور گاؤں کے کلّو عرف نریندر، سرائے خاص کے رئیس، فتح گنج مغربی نئی بستی کے اقبال اور اُس کی اہلیہ گلشن، میرگنج کے شیخو پورہ کے جہاں گیر اور اُس کی اہلیہ کو عمر قید کی سزا سنائی ہے۔

ان سبھی چھ ملزمان پر یہ جرم ثابت ہوا ہے کہ یہ لوگ مغربی بنگال سے بریلی لائی گئی دو سگی نابالغ بہنوں کی اسمگلنگ اور خرید فروخت میں شامل تھے۔

دراصل بریلی پولیس کی 'اینٹی ہیومن ٹریفکنگ یونٹ' اے ایچ ٹی یو نے 6 مئی سنہ 2013ء کو میرگنج پولیس کی مدد سے چورئی دلپت پور گاؤں میں کلّو عرف نریندر کے گھر پر چھاپہ مارا تھا۔ اس دوران نریندر کے گھر سے 10 اور 13 برس کی دو سگی نابالغ بہنیں برآمد ہوئیں تھیں۔

اُنہوں نے پولیس کو بتایا تھا کہ وہ دونوں سگی بہنیں ہیں اور اُنہیں بنگال سے خرید کر لایا گیا ہے۔

اُنہوں نے پولیس کو بیان دیتے ہوئے بتایا تھا کہ 2 اپریل سنہ 2013ء کو انگوری عرف سُمن نام کی خاتون ہاوڑا ریلوے اسٹیشن سے کام دلانے کے بہانے سے بریلی لے کر آئی تھی۔ دو دن تک اُس نے جہاں گیر کے گھر میں رکھا اور رئیس کے ذریعے کلّو عرف نریندر کو 26 ہزار روپیہ میں فروخت کر دیا۔

دونوں بہنیں گذشتہ 13 دن سے کلّو کے گھر میں تھیں۔ دونوں بہنوں میں سے ایک نے پولیس کو بتایا کہ ان 13 دنوں میں کلّونے متعدد مرتبہ اُس کے ساتھ زبردستی بھی کی۔

دونوں بہنوں کو فروخت کرنے والے انگوری عرف سُمن، پولیس کے چھاپہ مارنے سے قبل فرار ہو چکی تھی۔ کلّو کے ہی گھر میں پولیس نے جہاں گیر، اقبال اور رئیس کو گرفتار کیا تھا۔ جہاں گیر نے بتایا تھا کہ دونوں لڑکیاں دو دن تک اُس کے گھر بھی رکی تھیں۔

اس سے قبل وہ فتح گنج مغربی میں اقبال کے گھر بھی رہی تھیں۔ رئیس نے انگوری سے کلّو کے ہاتھوں دونوں بہنوں کا سودا کرایا تھا۔ اس معاملہ میں ملوث چوتھے شخص کا نام کلّو عرف نریندر ہے۔ جہاں گیر کی اہلیہ ریشمہ اور اقبال کی اہلیہ گلشن کو بھی پولیس نے گرفتار کیا تھا۔

بہرحال اس معاملہ میں کلّو، رئیس، اقبال، جہاں گیر،ریشمہ اور گلشن کو عمر قید کی سزا سنائی گئی ہے۔