مسلم رہنماؤں کی بے جا گرفتاری غلط: مولانا یعسوب عباس

آل انڈیا شیعہ پرسنل لاء بورڈ کے جنرل سکریٹری مولانا یعسوب عباس نے تبدیلیٔ مذہب کے نام پر مذہبی رہنماؤں کی گرفتاری کی سخت مذمت کی۔

مولانا یعسوب عباس نے ای ٹی وی بھارت سے گفتگو کے دوران تبدیلیٔ مذہب کے نام پر مذہبی رہنماؤں کی گرفتاری کی سخت الفاظ میں مذمت کی۔ مولان یعسوب عباس نے کہا کہ 'جنگل راج میں بے بنیاد الزامات کے تحت بے قصوروں کی گرفتاری کی سخت مذمت کرتا ہوں۔ اگر کوئی مجرم ہے تو ہمارے ملک میں عدلیہ ہے، قانون ہے۔ اس کے تحت کارروائی ہو۔

واضح رہے کہ ماضی قریب میں مولانا کلیم صدیقی کو میرٹھ سے اے ٹی ایس نے گرفتار کیا تھا جس کے بعد لکھنؤ میں پریس کانفرنس کر کے اے ڈی جی لاء اینڈ آرڈر نے بتایا تھا کہ تبدیلیٔ مذہب کے متعدد کاموں میں مولانا کلیم صدیقی ملوث تھے اس لیے انہیں گرفتار کیا گیا ہے۔

مولانا کلیم صدیقی کی گرفتاری کے خلاف ملک بھر میں ان کی رہائی کے لیے آوازیں بلند ہورہی ہیں جب کہ کچھ جگہوں پر احتجاج بھی کئے جارہے ہیں اس حوالے سے کچھ لوگوں کی گرفتاری بھی ہوئی جس کے بعد سینیئر آئی اے ایس افسر افتخار الدین سے بھی پوچھ گچھ کے لیے ایس آئی ٹی کی تشکیل دی گئی ہے۔

مولانا یعسوب عباس نے کہا کہ کسی بھی شخص کو تبدیلیٔ مذہب کے نام پر گرفتار کرنا غلط ہے اس کی ہم سخت مذمت کرتے ہیں۔