لاپروائی کے سبب ہوئی ہے شہاب الدین کی موت: حاجی ضمیر اللہ

ضلع علی گڑھ کے سابق رکن اسمبلی حاجی ضمیر اللہ خان نے کہا کہ انتظامیہ کی لاپروائی کی وجہ سے شہاب الدین کی موت ہوئی ہے۔

ضلع سیوان کے سابق رکن پارلیمان اور آر جے ڈی کے قد آور رہنما ڈاکٹر محمد شہاب الدین کی موت پر اظہار تعزیت کرتے ہوئے ضلع علی گڑھ سے دو بار رکن اسمبلی رہ چکے حاجی ضمیر اللہ خان نے لوک سبھا اسپیکر سے مطالبہ کیا کہ جس طرح لاپروائی کی وجہ سے شہاب الدین کی موت ہوئی ہے کہیں ایسا ہی معاملہ اعظم خان کے ساتھ نہ ہو اس لیے انہیں فوراً جیل سے نکال کر ایمس میں داخل کرایا جائے تاکہ ان کی جان کو خطرہ نہ ہو۔

حاجی ضمیر اللہ خاں کا کہنا ہے کہ 'شہاب الدین کو بروقت طبی امداد نہیں ملی تھی جس کی وجہ سے ان کی موت ہوئی ہے اس لیے میں اسے قتل مانتا ہوں اور مجھے شک ہے اعظم خاں کے ساتھ کچھ بھی ہو سکتا ہے۔'

انہوں نے کہا کہ اسی چیز کو لے کر مجھے شک ہے کہ اعظم خاں کے ساتھ بھی ایسا کوئی حادثہ ہوسکتا ہے۔ اسی لیے میڈیا کے ذریعے لوک سبھا کے اسپیکر سے مطالبہ کرتا ہوں اعظم خان کو فوراً جیل سے نکال کر ایمس میں داخل کروایا جائے۔