سب سے زیادہ ناانصافی رامپور میں، اسی لئے یہاں سے ریلی شروع کی گئی: اکھلیش یادو

سماج وادی پارٹی کے سربراہ اور سابق وزیر اعلیٰ اکھلیش یادو گزشتہ روز رامپور پہنچے اور انہوں نے سماج وادی پارٹی کے مشن 2022 کا سائیکل ریلی نکال کر آغاز کیا۔ اس دوران انہوں نے میڈیا سے گفتگو کرتے ہوئے کہا کہ سماج وادیوں پر سب سے زیادہ ناانصافیاں رامپور میں ہو رہی ہیں۔ اس لئے ہم نے رامپور سے ہی مشن 2022 کا آغاز کیا ہے۔

سماج وادی پارٹی کے سربراہ اور سابق وزیر اعلیٰ اکھلیش یادو اپنے طے شدہ پروگرام کے تحت رامپور پہنچے۔ اکھلیش یادو نے محمد علی جوہر یونیورسٹی کے نزدیک ایک جلسہ عام کو خطاب کرنے کے بعد سائیکل چلاکر اترپردیش کے آئندہ 2022 کے اسمبلی انتخابات میں سماج وادی پارٹی کا پرچم لہرانے کے لئے مشن 2022 مہم کی سائیکل ریلی کا اہتمام کیا۔

اس دوران اکھلیش یادو کے ساتھ ساتھ کثیر تعداد میں پارٹی کارکنان نے سائیکل چلا کر اپنے جوش و جذبے کا اظہار کیا۔ یہ سائیکل ریلی محمد علی جوہر یونیورسٹی سے شروع ہوئی تقریباً 12 کلو میٹر کی مسافت طے کرنے کے بعد رامپور کے امبیڈکر پارک پر اختتام پذیر ہوئی۔

اکھلیش یادو نے میڈیا کے نمائندوں کے سوالوں کا جواب دیتے ہوئے کہا کہ سماج وادیوں پر سب سے زیادہ ناانصافیاں رامپور میں ہو رہی ہیں۔ اسی لئے انہوں اپنے مشن 2022 مہم کا آغاز رامپور سے سائیکل چلا کر کیا ہے۔

مرادآباد میں صحافیوں کے ساتھ رونما ہونے والے واقعہ کے سوال کے جواب میں اکھلیش یادو نے بی جے پی حکومت پر الزام عائد کرتے کہا کہ حکومت مختلف طریقوں سے سماج وادی کو کمزور کرنے کے لئے اس قسم کے حربے استعمال کر رہی ہے۔ کبھی لفٹ کی بجلی کاٹ دی جاتی ہے تو کبھی ایک دو نام نہاد صحافیوں کو ہمارے خلاف کر دیا جاتا ہے۔

واضح رہے کہ گزشتہ روز اکھلیش یادو جب مرادآباد پہنچے تھے تو سکیورٹی اہلکاروں کی میڈیا کے نمائندوں کے ساتھ دھکا مکی ہو گئی تھی جس میں ایک دو صحافی زخمی بھی ہو گئے تھے۔