بی جے پی حکومت میں جمہوریت ختم ہوتی جا رہی ہے: دھرمراج یادو

ملک سے غداری کے مقدمات کی بڑھتی تعداد پر سماجوادی پارٹی کے بارہ بنکی نشست سے رکن اسمبلی دھرمراج یادو عرف سریش یادو نے وزیراعظم نریندر مودی پر شدید نکتہ چینی کی ہے۔ انہوں نے کہا ہے 'خود کو پردھان سیوک کہنے والے وزیراعظم گاؤں کے پردھان کی مانند کام کرتے ہیں۔ جس طرح سے گاؤں کے پردھان اپنے حامیوں سے خوش رہتے ہیں اور مخالفین لوگوں کو پریشان کرتے ہیں، اسی طرز پر وزیراعظم بھی کام کرتے ہیں۔'

اتر پردیش کے بارہ بنکی میں اپنے دفتر پر دھرمراج یادو نے ای ٹی وی بھارت سے ایک ہندی اخبار کی رپورٹ کا ذکر کرتے ہوئے کہا کہ بی جے کی حکومت میں جمہوریت مکمل طور سے ختم ہوتی جا رہی ہے۔

انہوں نے کہا کہ بی جے پی حکومت میں عوام کو آئین سے ملی اظہارِ خیال کی آزادی بھی ختم ہو رہی ہے۔

انہوں نے کہا کہ آئین میں ہمیں یہ آزادی حاصل ہے کہ ہم حکومت کی حمایت میں یا مخالفت میں اپنے خیالات کا اظہار کر سکتے ہیں۔ لیکن حکومت ان لوگوں پر ملک سے غداری کا مقدمہ درج کر کے ان کی آواز کو دبا رہی ہے۔

واضح رہے کہ ایک ہندی اخبار کی ویب سائٹ پر ایک رپورٹ شائع ہوئی ہے، جس میں کہا گیا ہے کی بی جے پی اقتدار والی ریاستوں میں ملک سے غداری کے مقدمات میں اضافہ ہوا ہے اور لا کمیشن نے اس کے غلط استعمال کو روکنے ہدایت دی ہے۔

رپورٹ کے مطابق ملک میں 10 برس کے دوران ملک سے بغاوت کےکل 816 معاملے درج ہوئے ہیں۔ ان میں 168 بہار، 139 تملناڈو، اتر پردیش میں 115، جھارکھنڈ میں 62، اور کرناٹک میں 50 معاملے کے درج کئے گئے ہیں۔