متحد ہوکر بی جے پی حکومت کو بے دخل کرنے کا وقت آگیا: آدتیہ یادو

پرگتی شیل سماج وادی پارٹی کی یہ یاترا گزشتہ دیر شام دیوبند اور گھلولی چیک پوسٹ ہوتے ہوئے سہارنپور پہنچی، پارٹی کے قومی صدر شیوپال یادو کے بیٹے اور پارٹی کے قومی جنرل سکریٹری آدتیہ یادو اس یاترا کی قیادت کررہے تھے، ان کا گھلولی چیک پوسٹ پر کارکنان نے زبردست استقبال کیا۔

ریاست اتر پردیش کے سہارنپور میں پرگتی شیل سماج وادی پارٹی کے قومی جنرل سکریٹری آدتیہ یادو نے کہاکہ ریاست کا نوجوان بے روزگار ہے، مہنگائی اور قانون نظم ونسق پر حکومت کا کوئی قابو نہیں ہے، بھائی کو بھائی سے لڑانے کا کام کیا جارہاہے۔ اس لئے اقتدار کی تبدیلی کے لئے پرگتی شیل سماج وادی پارٹی کے ذریعہ 'سماجک پریورتن یاترا' کی شروعات کی گئی ہے۔ اس یاترا سے اقتدار کی تبدیلی ضرور ہوگی اور اترپردیش کے عوام کو راحت ملے گی۔

پرگتی شیل سماج وادی پارٹی کی یہ یاترا گزشتہ دیر شام دیوبند اور گھلولی چیک پوسٹ ہوتے ہوئے سہارنپور پہنچی، پارٹی کے قومی صدر شیوپال یادو کے بیٹے اور پارٹی کے قومی جنرل سکریٹری آدتیہ یادو اس یاترا کی قیادت کررہے تھے، ان کا گھلولی چیک پوسٹ پر کارکنان نے زبردست استقبال کیا۔ اس کے بعد ناگل اور گاگلہیڑی میں بھی استقبال کیا گیا۔

سہارنپور پہنچنے پر سرکٹ ہاؤس میں میڈیا سے گفتگو کرتے ہوئے پارٹی کے قومی جنرل سکریٹری آدتیہ یادو نے کہاکہ سماجک پریورتن یاترا 12 اکتوبر کو متھرا سے اترپردیش میں اقتدار کی تبدیلی کے مقصد سے پارٹی کے قومی صدر شیو پال یادو نے شروع کی تھی۔

انہوں نے کہا کہ اس ملک کو خاص کر اترپردیش کو نفرت کی آگ میں جھونکنے کی کوشش کی جارہی ہے، مگر عوام ان کی اس پالیسی کو سمجھ چکی ہے اور وہ تبدیلی کا ذہن بناچکی ہے۔

انہوں نے کہا کہ ملک اسی وقت ترقی کرسکتا ہے، جب سبھی مل کر ترقی کے لئے کام کریں۔ انہوں نے کہا کہ ان کی اس یاترا کا مقصد موجودہ حکومت کی غلط پالیسیوں کو عوام تک پہنچانا ہے اور وہ اس میں ضرور کامیاب ہوں گے۔

آدتیہ یادو نے کہا کہ نفرت کی سیاست زیادہ دن تک نہیں چل سکتی۔ آج تعلیم یافتہ نوجوان بے روزگار ہے، انہیں روزگار نہیں مل پارہا ہے۔ وہ مایوسی کا شکار ہیں۔ انہوں نے کہا کہ اب وقت آگیا ہے کہ سبھی اپوزیشن جماعتیں متحد ہوکر بی جے پی حکومت کو اترپردیش سے بے دخل کریں۔