سہارنپور میں ایک حاملہ خاتون کی موت واقع ہوگئی ہے، اہل خانہ نے ڈاکٹر پر لاپرواہی کا الزام عائد کیا ہے۔ اہل خانہ نے لاش کو روڈ پر رکھ کر ہنگامہ آرائی بھی کی۔ موقع پر پہنچی پولیس نے اہل خانہ کو سمجھا بجھا کر خاموش کیا۔
متوفیہ کے اہل خانہ نے ڈاکٹر کے اوپر سخت کارروائی کا مطالبہ کیا ہے۔ پولیس نے لاش کو قبضہ میں لے کر پوسٹ مارٹم کے لئے بھیج دیا۔ یہ معاملہ تھانہ جنک پوری کا بتایا جارہا ہے۔
اطلاع کے مطابق آج دوپہر تقریبا ایک بجے تھانہ جنک پوری میں واقع ممتا شرما ہسپتال میں ایک خاتون کو ڈلیوری کے لیے داخل کرایا گیا تھا، ڈاکٹر ممتا نے خاتون کا آپریشن کیا اور خاتون نے دو بچوں کو جنم دیا لیکن آپریشن کے ایک گھنٹے بعد ہی خاتون کی طبیعت خراب ہونے لگی، اسی دوران ڈاکٹر نے خاتون کو چنڈی گڑھ لے جانے کی صلاح دی۔
اہل خانہ جیسے ہی خاتون کو چنڈی گڑھ لے جانے کے لئے باہر نکلے خاتون کی موت واقع ہوگئی، جس کے بعد ناراض اہل خانہ نے لاش کو روڈ پر رکھ کر ہنگامہ آرائی شروع کر دی، موقع پر پہنچی پولیس نے اہل خانہ کو سمجھایا۔
