ریاست اترپردیش کے ضلع سہارنپور کے دیوبند علاقہ میں کورونا ویکسین کو لیکر افواہوں کا بازار گرم ہے۔ جس کے بارے میں علماء دیوبند نے بڑی سازش کا حصہ بتایا ہے اور کہا ہے کہ اس طرح کی افواہوں پر توجہ نہ دی جائے بلکہ اس کورونا ویکسین کا استعمال کرکے ملک سے اس خطرناک بیماری کا خاتمہ کیا جائے۔
دیوبند: کورونا ویکسین کے تعلق سے افواہوں کا بازار گرم واضح رہے کہ گذشتہ کچھ روز سے سہارنپور کے دیوبند علاقہ میں افواہیں پھیلائی جارہی ہیں کہ کچھ کمپنیاں جو کورونا ویکسین بنا رہی ہیں، وہ اس میں خنزیر کا گوشت استعمال کر رہی ہیں، جس سے پوری دنیا کے علماء طبقہ میں تشویش کا ماحول بنا ہوا ہے۔
یہ بھی پڑھیں؛ علیگڑھ مسلم یونیورسٹی کا صد سالہ تاریخی سفر
اس سلسلے میں آج جامعہ فاطمة الزہرہ اینگلو عربک دیوبند کے مہتمم مولانا لطف الرحمن صادق قاسمی نے کہا کہ کورونا ویکسین کے بارے میں میرا یہ کہنا ہے کہ جو افواہیں کورونا ویکسین کے سلسلہ میں آئی ہیں، وہ سراسر غلط ہیں، کیونکہ ابھی اس سلسلہ میں کوئی تحقیق اور تصدیق نہیں ہے۔ لہٰذا، ایسی افواہیں اڑانا بالکل غلط ہے۔
مولانا لطف الرحمن صادق دیوبندی انہوں نے کہا کہ یہ افواہیں شرپسند عناصر کی ایک بڑی سازش کا حصہ ہوسکتی ہیں۔ ان افواہوں کا مقصد یہ بھی ہوسکتا ہے کہ اس ویکسین کا ایک طبقہ استعمال کرے اور دوسرا طبقہ اس کا استعمال نہ کرسکے، اس لیے میری تمام لوگوں سے اپیل ہے کہ اس ویکسین کا استعمال کیا جائے تاکہ ملک سے اس سنگین بیماری کا خاتمہ ہوسکے اور افواہوں پر قطعی توجہ نہ دی جائے۔
