اترپردیش کے ضلع شاہجہاں پور میں ہفتہ کو ایک ٹریکٹر ٹرالی پل کی ریلنگ سے ٹکرا گئی جس کے نتیجے ٹرکیٹر نیچے گر گئی۔ اس حادثے میں خواتین اور بچوں سمیت 12 افراد کے جاں بحق ہونے کی خبر ہے۔ خدشہ ہے کہ مرنے والوں کی تعداد بڑھ سکتی ہے۔ بتایا گیا کہ ٹرالی میں تقریباً 30 سے زائد افراد سوار تھے۔ اطلاعات کے مطابق حادثہ تلہار تھانہ علاقہ کے تحت آنے والے بیرسنگ گاؤں کے قریب پیش آیا۔ لوگ یہاں گرہ ندی سے پانی لینے کے لیے آئے تھے۔ اطلاع ملتے ہی پولیس کے اعلیٰ افسران موقع پر پہنچ گئے۔ وہیں وزیر اعلی یوگی آدتیہ ناتھ نے اس حادثے پر افسوس کا اظہار کیا ہے۔
وزیر اعلیٰ یوگی آدتیہ ناتھ نے شاہجہاں پور ضلع میں گرہ ندی حادثے میں ہلاک ہونے والوں کے خاندانوں کے ساتھ تعزیت کا اظہار کیا ہے۔ وزیر اعلیٰ یوگی نے ضلعی انتظامیہ کے افسران کو ہدایت کی ہے کہ زخمیوں کو فوری طور پر اسپتال لے جائیں اور انہیں مناسب علاج فراہم کیا جائے۔ اس کے ساتھ ہی زخمیوں کی جلد صحت یابی کی بھی دعا کی ہے۔ وزیر اعلیٰ یوگی آدتیہ ناتھ کی ہدایت پر ضلع انتظامیہ کے افسران، ایس ڈی آر ایف اور این ڈی آر ایف کی ٹیمیں موقع پر پہنچ کر امدادی کاموں میں مصروف ہیں۔ تمام اعلیٰ انتظامی افسران بھی موقع پر پہنچ گئے ہیں۔