Umesh Pal murder case عتیق احمد کی بیوی پر پچیس ہزار روپے کا انعام

پریاگ راج میں ہوئے امیش پال قتل معاملے میں عتیق احمد کی بیوی شائستہ پروین کو ملزم قرار دیا گیا ہے۔ پولیس کئی دنوں سے شائستہ پروین کو تلاش کررہی ہے، وہیں ان کی گرفتاری پر نقد روپے کے انعام کا اعلان کیا ہے۔ Atiq Ahmeds wife Shaista Parveen

پریاگ راج: سابق رکن پارلیمان عتیق احمد کے بیٹے کے بعد ان کی بیوی شائستہ پروین کی گرفتاری پر بھی پولیس نے انعام کا اعلان کردیا ہے۔ شائستہ پروین کو امیش پال قتل معاملے میں ملزم قرار دیا گیا ہے، 14 فروری کو بعد سے پولیس انہیں تلاش کررہی ہے، پولیس نے شائستہ پروین پر 25 ہزار روپے کے انعام کا اعلان کیا ہے۔ پریاگ راج پولیس کے مطابق، 24 فروری کو دھوم گنج تھانہ علاقے کے سُلیم سرائے میں امیش پال کو اس کے گھر کے باہر گھیر کر گولی مار کر ہلاک کر دیا گیا تھا۔ امیش پال کے دو سرکاری گنر بھی شوٹ آوٹ میں مارے گئے۔ اس کے بعد امیش پال کی بیوی جیا پال کی جانب سے مقدمہ درج کرایا گیا۔ اس میں جیل میں بند عتیق احمد کے ساتھ ہی ان کے بھائی خالد عظیم عرف اشرف اور ان کی بیوی شائستہ پروین کو بھی ملزم بنایا گیا تھا۔ واقعے میں عتیق احمد کے ایک بیٹے کے ساتھ ہی دیگر بیٹوں کو بھی ملزم بنایا گیا ہے۔ اس کے علاوہ غلام اور گڈو کو نامزد کرنے کے ساتھ ہی 9 نامعلوم افراد کے خلاف مقدمہ درج کرایا گیا ہے۔اس واقعے میں ملوث تمام شوٹروں کے لیے ڈھائی، ڈھائی لاکھ روپے کے انعام کا اعلان کیا گیا ہے۔

پریاگ راج پولیس اور ایس ٹی ایف کی ٹیم دیگر ملزمین کے ساتھ ہی عتیق احمد کی بیوی شائستہ پروین کو تلاش کر رہی ہے۔ اس دوران پریاگ راج پولیس کی جانب سے شائستہ پروین پر 25 ہزار روپے کے انعام کا اعلان کیا گیا ہے۔ پہلی بار کسی بھی مقدمے میں مطلوب ہونے پر شائستہ پروین پر انعام کا اعلان کیا گیا ہے۔ امیش پال قتل کیس میں شائستہ پروین کے خلاف دھوم گنج پولیس اسٹیشن میں مقدمہ درج کیا گیا ہے۔ اس سے پہلے شائستہ پروین کے خلاف کرنل گنج تھانے میں مقدمہ درج کیا گیا تھا۔