'ریسپیکٹ یور گرینڈ پیرینٹس' پروگرام کا انعقاد

ریاست اترپردیش کے شہر رامپور میں واقع سینٹ میریز سینئر سیکنڈری اسکول کی طالبات نے دادا دادی کو اولڈ ایج ہوم میں داخل نہ کرنے کا پیغام دیا۔

آج کے اس ترقی یافتہ سماج کی ایک سب سے بڑی برائی جو منظر عام پر نظر آتی ہے وہ ہے اپنے بوڑھے والدین کو اولڈ ایج ہوم میں داخل کرانا۔ سماج سے اولڈ ایج ہوم جیسی لعنت کے خاتمے کے لیے سینٹ میریز سینئر سیکنڈری اسکول کی طالبات نے سماج کی ان کڑوی سچائیوں کو بڑے ہی خوبصورت انداز میں ڈرامے پیش کرکے اجاگر کیا۔ اسکول کی سالانہ تقریب کے موقع پر شہر کی سرکردہ شخصیات کے ساتھ ہی طالبات کے والدین بھی موجود تھے۔

پروگرام کا مرکزی موضوع تھا 'ریسپیکٹ یور گرینڈ پیرینٹس' یعنی اپنے دادا۔دادی کا احترام کیجئے'۔ اس کے تحت طالبات نے مختلف کردار ادا کرکے حاضرین کو پیغام دینے کوشش کی کہ وہ اپنے والدین کا احترام کریں اور اپنے بچوں کو ان کے دادا دادی سے الگ نہ کریں۔ کبھی بھی اولڈ ایج ہوم نہیں بھیجیں۔

اولڈ ایج ہوم کی بدعت کا ذکر کرتے ہوئے دادی کا کردار ادا کرنے والی منتہا کہتی ہیں کہ آج کی نئی نسل اپنی تہذیب کو فراموش کرتے ہوئے مغربی تہذیب کو اپنانے میں فخر محسوس کر رہی ہے۔ جہاں پر والدین بوڑھے ہو جاتے ہیں تو انہیں اولڈ ایج ہوم منتقل کر دیا جاتا ہے یا انہیں گھر میں وہ سکون و آرام نہیں ملتا جس کے وہ مستحق ہوتے ہیں۔ موجودہ دور کی نئی نسل والدین کو بوجھ تصور کر رہی ہے۔ ان کا کہنا تھا کہ کبھی بھی کوئی شخص اپنے والدین کو اولڈ ایخ ہوم نہیں بھیجے۔