خاص رپورٹ: ماہ صیام پر اس سال بھی کورونا کا اثر

سال گذشتہ کی طرح اس سال بھی رمضان المبارک کے دوران کورونا وبا کا اثر نمایاں طورپر محسوس کیا جا رہا ہے۔ گزشتہ برس ماہ رمضان میں مکمل لاک ڈاؤن نافذ تھا اور لوگوں نے اپنے گھروں میں ہی عبادات کے فرائض انجام دئیے تھے، وہیں ایک مرتبہ پھر کورونا کے بڑھتے معاملے کے سبب حکومت نے نائٹ کرفیو سمیت کچھ ضرور پابندیاں عائد کردی ہیں، جس کے سبب مسلم طبقہ میں مایوسی کا پایا جانا لازمی ہے۔

ریاست اترپردیش کے شہر سہارنپور و دیوبند علاقہ میں رحمت و برکت کے مہینے ماہ صیام کی آمد کی وجہ سے مسلم معاشرہ میں کافی جوش خروش پایا جارہا ہے اور رمضان المبارک کی دستک سے شہر کے مسلم محلوں کی رونق میں اضافہ ہوتا جارہا ہے تو وہیں رمضان المبارک کے پیش نظر سحر و افطار کی دوکانیں بھی سجنا شروع ہوگئی ہیں اور لوگ سحر و افطار کے لئے عمدہ اشیاءخوردنی کی خریدو فروخت میں مصروف ہیں ۔
حالانکہ اس سال بھی رمضان المبارک کے دوران کورونا وبا کا اثر نمایاں طورپر محسوس کیا جارہا ہے، جہاں گزشتہ برس رمضان کے مہینے میں مکمل لاک ڈاؤن نافذ تھا اور لوگوں نے اپنے گھروں میں ہی عبادات کے فرائض انجام دئیے تھے، وہیں ایک مرتبہ پھر کورونا کے بڑھتے معاملے کے سبب حکومت نے نائٹ کرفیو سمیت کچھ ضرور پابندیاں عائد کردی ہیں، جس کے سبب مسلم طبقہ میں مایوسی کا پایا جانا لازمی ہے۔

حالانکہ کورونا وبا کے باوجود بھی شہر کے مسلم علاقوں میں رحمتوں و برکت کے مقدس مہینے کی فیوض و برکات کی رونقیں نمایاں طور پر نظر آرہی ہیں اور شہر کے دارالعلوم چوک، اسلامیہ بازار، دیوان دروازہ، سرسٹہ بازار، ریتی چوک پٹھانپورہ، بھائیلہ روڈ ،بس اسٹینڈ اور خانقاہ چوک وغیرہ میں روزہ داروں کے لئے خصوصی سحری کی اشیاء سوائیاں، فینیاں، خجلہ اور اسپیشل رمضان بریڈ کے علاوہ مختلف اقسام کی چیزوں سے دوکانیں سج گئی ہیں۔

لوگ سحری کی سامان کے ساتھ افطار کے لیے بھی دل کھول کر خریداری میں مصروف ہیں۔ اتنا ہی نہیں روزمرہ کی استعمال شدہ اشیاء کی خریداری بھی آج کل زوروں پر ہے، جس کے سبب بازاروں میں پھل، سبزی اور راشن کی دوکانوں پر لوگوں کی خوب آمدو رفت نظر آرہی ہے ۔ ماہ صیام کی نوید کے بعد جہاں شہر کی گلیاں گلزار ہوگئی ہیں وہیں تمام مساجد میں نمازیں تراویح کا بہتر بندوبست کیا جارہا ہے اور حافظ قرآن مساجد ،گھروں اور دوکانوں وغیرہ میں قرآن کریم سنانے کی تیاروں میں مصروف ہیں ۔لیکن نائٹ کرفیو کے سبب اس سال بھی نماز تراویح کے متاثر ہونے کا خطرہ محسوس کیا جارہاہے۔

وہیں بڑھتی گرمی اور آسمان چھوتی مہنگائی کے باوجود روزہ داروں میں زبردست جوش و خروش پایا جارہا ہے۔ لیکن میونسپل کونسل انتظامیہ کی لاپرواہی اور صفائی ملازمین کوتاہی کے سبب رمضان المبارک کے موقع پر بھی شہر میں صفائی ستھرائی کا نظا م بہتر نہیں ہے ،وہیں پانی سپلائی کانظام اس سے بھی کہیں زیادہ خراب ہے۔ حالانکہ میونسپل بورڈ کے ذمہ داران کا کہنا ہے کہ اس مقدس مہینہ میں روزہ داروں کو بورڈ سطح پر کسی قسم کی دشوار ی پیش نہیں آنے دی جائے گی اور مساجد اور باالخصوص مسلم محلوں میں صفائی ستھرائی کرنے کی ملازمین کو سخت ہدایت دی گئی ہے۔