رامپور سے 27 اپریل کو کورونا وائرس جانچ کے لئے 792 سیمپل بھیجے گئے جن میں سے 725 افراد کی رپورٹ آ چکی ہے جبکہ 67 افراد کی رپورٹ آنی ابھی باقی ہے۔
ضلع کلکٹر آنجنئے کمار سنگھ نے میڈیا کو جانکاری دیتے ہوئے بتایا کہ موصول ہوئی رپورٹ کے مطابق 689 افراد کی رپورٹ منفی آئی ہے۔ انہوں نے کہا کہ آج ایک نیا معاملہ سوار کے کھیڑا ٹانڈا سے سامنے آیا ہے۔
رامپور کے ڈی ایم نے کہا کہ متاثرہ شخص دہلی سے آیا تھا اور پولیس چیک پوسٹ پر روکا گیا ۔ جب اس کی کورونا جانچ کرائی گئی تو رپورٹ مثبت آئی ہے۔ جس سے اب ضلع میں کورونا مثبت مریضوں کی تعداد بڑھ کر 16 ہوگئی ہے۔ ساتھ ہی انہوں نے یہ بھی کہا کہ ابھی تک رامپور میں جتنے کورونا مثبت معاملے سامنے آئے تھے ان میں سے 4 افراد ٹھیک بھی ہو گئے اور ان کو چھٹی بھی دی جا چکی ہے۔
انہوں نے کہا کہ جوہر یونیورسٹی کے کوارنٹین سینٹر میں 6 افراد امروہہ سے بھی لائے گئے تھے اگر ان تمام افراد شامل کردیا جائے تو رامپور میں کورونا مثبت مریضوں کی 22 ہو جائے گی۔
ضلع مجسٹریٹ نے کہا کہ رامپور میں جتنے بھی افراد کورونا وائرس پازیٹیو پائے گئے ہیں ان میں سے کسی بھی شخص کی حالت نازک نہیں ہے اور نہ ہی ان میں کسی بھی قسم کی کوئی علامات ظاہر ہو رہی ہیں۔ انہوں نے امید ظاہر کرتے ہوئے کہا کہ بقیہ افراد بھی جلد ہی ٹھیک ہوکر ڈسچارج کر دئے جائیں گے۔
