دہائیوں پرانے فانوس سے آج بھی روشن ہے رضا لائبریری

ریاست اترپردیش کے شہر رامپور میں قائم رام پور رضا لائبریری میں لگائے گئے بلب گذشتہ سو برسوں سے لائبریری کی رونق میں اضافہ کر رہے ہیں۔

تعجب خیز بات یہ ہے کہ اتنا طویل عرصہ گزرنے کے باوجود بھی ابھی تک وہ نہ تو خراب ہوئے ہیں اور نہ ہی اس کی رونق میں کوئی کمی دیکھنے کو ملی ہے۔

لائبریری میں لگائے گئے فانوس زائرین کے لیے توجہ کا مرکزہیں۔

رامپو رضا لائبریری اپنی بیش قیمت علمی خزانہ کی وجہ سے دنیا بھر میں منفرد مقام رکھتی ہے۔ یہاں علم و ادب کے گرانقدر خزانے موجود ہیں۔ کتابوں کے ساتھ لائبریری کی عمارت بھی فن تعمیر کا بہترین نمونہ سمجھی جاتی ہے۔

لائبریری کی عمارت انڈو یوروپین طرز تعمیر پر بنائی گئی ہے۔ اس کے اندر ایک دربار ہال ہے جس کی سجاوٹ سونے کے پانی سے کی گئی ہے۔

تعمیر کی خاص بات یہ ہے کہ یہاں پانچ خوبصورت فانوس ہیں جن میں لٹکے بلب گذشتہ سو برسوں سے مسلسل اپنی روشنی بکھیر رہے ہیں، اور تب سےابھی تک اس میں کوئی خرابی بھی واقع نہیں ہوئی ہے۔

رضا لائبریری کی تعمیر کی تاریخ سے پتہ چلتا ہے کہ یہ فانوس آسٹریا سے منگوائے گئے تھے۔ نواب صاحب نے لائبریری کے لئے الگ سے ٹرانس فارمر کا بھی انتظام کیا تھا۔