رامپور میں ممبر پارلیمنٹ منتخب کرنے کے لئے صبح 7 بجے سے شروع ہونے والے ووٹنگ کے عمل میں دوپہر ایک بجے تک محض 20 فیصد ہی ووٹنگ ہو سکی ہے۔ وہیں مسلم اکثریتہ علاقہ سوار ٹانڈہ میں پولیس کی سختیوں اور خوف کا ماحول قائم کر دینے سے مسلم ووٹرز کافی مایوس ہیں۔ Uttar Pradesh By-Election
اطلاعات کے مطابق متعدد سماجوادی پارٹی کارکنان کو پولیس نے حراست میں بھی لیا ہے جس کی وجہ سے وہاں ووٹنگ کا عمل کافی متاثر ہو رہا ہے جس کی وجہ سے سماجوادی پارٹی امیدوار عاصم راجہ بھی خود ٹانڈہ پہنچے ہیں۔ اس کے علاوہ شہر کے پولنگ بوتھوں کی بات کی جائے تو وہاں بھی ووٹرز کافی کم تعداد میں گھروں سے نکل کر رہے ہیں۔ یہی وجہ ہے کہ صبح سے اب تک صرف 20 فیصد ہی ووٹنگ ہو سکی ہے۔
اس دوران ای ٹی وی بھارت نے رائے دہندگان سے بات چیت کی جس میں انہوں نے کہا کہ موجودہ حکومت کی غلط پالیسیوں سے وہ کافی پریشان ہو چکے ہیں، مہنگائی آسمان چھو رہی ہے اور بیروزگاری میں اضافہ ہوا ہے جس کی وجہ سے لوگوں میں حکومت کے خلاف ناراضگی پائی جا رہی ہے اور ووٹنگ فیصد کم ہونے کی ایک اہم وجہ بھی یہی ہے۔ ساتھ ہی یہاں موجود خواتین ووٹرز نے ای ٹی وی بھارت سے بات کرتے ہوئے کہا کہ انہوں نے مہنگائی، بیروزگاری اور ہندو مسلم تفریق کو ذہن میں رکھ کر ووٹ دیا ہے۔