رامپور: محمدﷺ کی تعلیمات کو عام کرنے کے مقصد سے غریبوں میں کپڑا تقسیم

پیغمبر اسلام حضرت محمدﷺکے یوم پیدائش کی مناسبت سے رحمۃ للعالمین کی تعلیمات کو تازہ کرنے کے مقصد سے امت مسلمہ کی جانب سے رحمت کے کاموں کا سلسلہ جاری ہے۔ ریاست اترپردیش کے شہر رامپور میں رئیس رامپوری سوسائٹی کی جانب سے آج غریبوں کے پرانے گرم کپڑوں کے اسٹال لگائے گئے اور ایک بے روزگار شخص کو روزی روٹی سے جوڑنے کے مقصد سے چائے خانہ کھول کر دیا گیا۔

رحمت اللعالمین کے یوم پیدائش کی مناسبت سے دنیا بھر کے مسلمان مختلف سرگرمیاں انجام دیکر اللہ کے آخری رسول حضرت محمدﷺ کی تعلیمات کو عام کرنے کی کوششیں کر رہے ہیں۔ اسی سلسلہ کی کڑی کے طور پر رامپور میں رئیس رامپوری کلیان سنستھان کی جانب سے ضرورت مندوں میں تقسیم کرنے کے لئے پرانے گرم کپڑوں کے اسٹال لگائے گئے۔

اس کے ساتھ رحمت عالم صلی اللہ علیہ وسلم کے انسانی خدمت کی تعلیمات کے جذبہ سے سرشار ہوکر بلا تفریق مذہب و ملت ایک بیروزگار شخص شیام لال کو چائے خانہ کھول کر دیا گیا۔

رئیس رامپوری کلیان سنستھان کی جانب سے کھولے گئے اس چائے خانہ کا نام 'بیتک چائے پینے کا جھوپڑا' رکھا گیا ہے۔

اس موقع پر مہمان خصوصی کے طور پر پہنچے بی جے پی کے مقامی رہنماء انل وششٹھ نے رئیس رامپوری کی زندگی پر روشنی ڈالتے ہوئے کہا کہ رئیس رامپوری بہت اچھی شخصیت کے مالک تھے۔

انہوں نے کہا کہ ان کے اندر بلا تفریق مذہب و ملت انسانیت کی خدمت کا جذبہ کوٹ کوٹ کر بھرا ہوا تھا۔ انہوں نے کہا کہ آج ان کے نقشہ قدم پر چلتے ہوئے ان کے بیٹے اور پوتے انسانیت کی بے لوث خدمات انجام دے رہے ہیں۔

رئیس رامپوری کلیان سنستھان کی جانب سے شیام لال کو چائے کا اسٹال دیے جانے کو لیکر بی جے پی رہنماء انل وششٹھ نے کہا کہ ایسے وقت میں رئیس رامپوری سنستھا نے شیام لال کو روزگار سے جوڑا ہے، جب ہمارا ملک بہت نازک حالات سے گزر رہا ہے۔ بے روزگاری عروج پر ہے۔ تمام روزگار ٹھپ ہو چکے ہیں۔

چائے کا روزگار دیے جانے پر شیام لال نے اپنی خوشی کا اظہار کرتے ہوئے رئیس رامپوری کلیان سنستھان کا شکریہ ادا کیا اور دعائیں دیں۔

نبی رحمت کے یوم پیدائش کے موقع پر مسلم شخصیات اور مسلم تنظیموں کی ان مثبت کاوشوں اور رحمت کے کاموں کو کافی سراہا جا رہا ہے۔