ریاست اترپردیش کے ضلع رامپور کی بینکوں میں وزیر اعظم جن دھن یوجنا کے تحت ملنے والے پانچ سو روپیے کی رقم حاصل کرنے والے افراد بڑی تعداد پہنچ رہی ہے۔
لاک ڈاؤن میں کم وقت کے لئے جب بینک کھلتے ہیں تو لوگوں کی تعداد زیادہ ہوجانے کی وجہ سے کافی دیر میں نمبر آتا ہے جس کی وجہ سے بزرگ اور خواتین کو کافی مشقتوں کا سامنا کرنا پڑ رہا ہے۔
کورونا وائرس سے بچاؤ کے لئے 21 دن کا لاک ڈاؤن جاری ہے۔ اس دوران یومیہ مزدور اور روز مرہ کے کام کرنے والوں کو کافی دشواریوں کا سامنا کرنا پڑ رہا ہے۔
ایسے افراد کو راحت دینے کے مقصد سے حکومت نے وزیراعظم جن دھن یوجنا کے تحت زیروں بیلینس والے اکاؤنٹ ہولڈرس کے لئے پانچ سو روپے ماہانہ دینے کا فیصلہ کیا ہے۔
لاک ڈاؤن کے وجہ سے تمام بینک برانچ 10 بجے سے دو بجے تک ہی کھل رہے ہیں۔ جس کی وجہ سے بینک کے باہر تک کافی بھیڑ جمع ہو جاتی ہے۔اس دوران کئی مرتبہ یہاں معاشرتی فاصلہ بھی متاثر ہو جاتا ہے۔
اس دوران لائن میں لگی بزرگ خواتین کو کافی مشقتوں کا سامنا کرنا پڑ رہا ہے۔ ان خواتین کا کہنا ہے کہ وہ تین تین گھنٹے یہاں کھڑی ہو رہی ہیں۔
جبکہ بینک آف انڈیا رامپور برانچ کے منیجر کا کہنا ہے کہ کچھ غیر لوگوں کے یہاں آ جانے سے بھیڑ ہو جاتی ہے۔ جس کی وجہ سے انتظام میں پریشانیاں آ رہی ہیں۔
