ترجیحی بنیاد پر عوامی مسائل حل کیے جائیں: ڈی ایم

عوامی شکایات اور پریشانیوں کے حل کے مقصد سے گوتم بدھ نگر نوئیڈا کی تینوں تحصیلوں میں 'سمپورن سمادھان دیوس' (یوم تصفیہ) کا اہتمام کیا گیا۔ اس موقع پر ضلع کی تینوں تحصیلوں میں مجموعی 77 شکایات درج کی گئیں۔ ان میں سے 9 شکایات کو محکمہ کے افسران نے موقع پر ہی حل کیا۔

ڈسٹرکٹ مجسٹریٹ سہاس ایل وائی نے دادری پہنچ کر اس کی صدارت کی۔ اس موقع پر ضلعی مجسٹریٹ سہاس ایل وائی نے تمام ضلعی افسران کو بتایا کہ اترپردیش حکومت اور انتظامیہ لوگوں کی شکایات اور پریشانیوں کو حل کرنے میں سنجیدہ ہے۔ عوام کی مشکلات کے فوری تدارک کے لئے تمام تحصیلوں میں 'سمادھان دیوس' کا انعقاد کیا جارہا ہے۔

انہوں نے تمام افسران سے عوام کی شکایات کو سنجیدگی سے لینے اور حل کرنے کی ہدایت بھی دی۔

دادری تحصیل میں مختلف محکموں سے وابستہ لوگوں کی طرف سے مجموعی37 شکایات درج کی گئیں۔ صدر تحصیل میں ایڈیشنل ڈسٹرکٹ مجسٹریٹ انتظامیہ دیواکر سنگھ کی صدارت میں یوم تصفیہ کا اہتمام ہوا۔

تحصیل جیور میں ایڈیشنل ڈسٹرکٹ مجسٹریٹ فنانس اینڈ ریونیو وندیتا شریواستو نے لوگوں کے مسائل سنے۔ یہاں لوگوں نے مختلف محکموں سے متعلق 35 شکایات درج کیں۔ تین شکایات کو فوری طور پر حل کیا گیا۔