Protest For Rehabilitated For Jannatu Baqi انہدام جنت البقیع کے سو سال مکمل ہونے پر بقیع آرگنائزیشن اور درسگاہ باقریہ کا مشترکہ احتجاج

رواں برس اپریل میں انہدام جنت البقیع کے سو برس مکمل ہونے جا رہا ہے۔اسی مناسبت سے بقیع آرگنائزیشن کی جانب سے ایک زبردست اور پروقار احتجاج کا انعقاد لکھنو کی مشہور و معروف کربلا تالکٹورہ میں شبیہ روضہ جنت البقیع کے سامنے کیا گیا۔اس احتجاج میں درسگاہ باقریہ لکھنو اور مدرسہ حجت العصر کے طلاب نے کثیر تعداد میں حصہ لیا ۔Protest For Rehabilitated For Jannatu Baqi

لکھنؤ:ریاست اترپردیش کے لکھنو میں ہونے والے پروگرام کا آغاز تلاوت قرآن پاک سے درسگاہ باقریہ سے فارغ التحصیل طالب علم محمد علی نے کیا۔اس کے بعد درسگاہ باقریہ اور مدرسہ حجت العصر کے طلاب نے جنت البقیع کی تاریخ، وہاں مدفون چار امام حضرت امام حسن مجتبی ع حضرت امام زین العابدین علیہ السلام، حضرت امام محمد باقر علیہ السلام اور حضرت امام جعفر صادق علیہ السلام کے ساتھ ساتھ رسول صلی اللہ علیہ آلہ وسلم کی بیٹی حضرت فاطمہ زہرا سلام اللہ علیہا کی زندگی پر تفصیل سے روشنی ڈالی ۔

نظامت کے فرائض سید علی امام عابدی شان لکھنوی نے انجام دی۔ درسگاہ باقریہ کے صدر مدرس مولانا حسن عسکری نے کہا کہ آج شاید ہمارے اس احتجاج سے کسی پر بہت زیادہ اثر نہ ہو لیکن کم از کم ہم اس پرزور احتجاج سے یہ ثابت کرنا چاہتے ہیں کہ ہم بےحس قوم نہیں ہیں اور جب تک جنت البقیع دوبارہ تعمیر نہیں ہو جاتی، ساری دنیا میں یہ احتجاج ہوتا رہے گا۔

احتجاجی مظاہرہ کے آخر میں درسگاہ باقریہ کے بانی مولانا حسین عباس ترابی نے کہا کہ برادران اہلسنت کے فقہ میں چار امام ہیں اور ان سب کے استاد حضرت امام جعفر صادق علیہ السلام ہیں جن کا مدفن جنت البقیع ہی ہے ۔

آخر میں مولانا حسین عباس ترابی نے تمام حاضرین کا شکریہ ادا کرتے ہوئے بقیع آرگنائزیشن کے ممبران خصوصا حسن جعفر نقوی اور میثم جعفر نقوی کا شکریہ ادا کیا۔

قابل ذکر ہے کہ درسگاہ کے تمام طلاب اپنے ہاتھوں میں جنت البقیع کا پلے کارڈ بلند کئے ہوئے تھے ۔مظاہرین سعودی حکومت کے خلاف احتجاج کر رہے تھے اس موقع پر طلاب اور طالبات کا جوش و خروش تھا۔