عائشہ صدیقہ گرلز انٹر کالج کی طالبات کااحتجاج

ریاست اُتر پردیش میں کانپور کے بیگم گنج علاقے میں واقع عائشہ صدیقہ گرلز انٹر کالج کی طالبات نے كلكٹریٹ آفس پہنچ کر انتظامی افسروں سے ملاقات کی اور ان سے انصاف کی مانگ کی۔

ضلع مجسٹریٹ دفتر کے باہر مظاہرہ کر رہی طالبات نے کہا کہ اسکول انتظا میہ نے مارکس شیٹ میں بینکنگ سبجیکٹ کے 96 طالبات کے نتائج جاری نہیں کیے ہیں۔

ایک سبجیکٹ کا رزلٹ نہیں آنے کی صورت میں اسکولی طالبات کسی بھی کالج میں داخلہ نہیں پاسکتی ہیں۔
مظاہرہ کررہی طالبات نے کہا کہ انہوں نے یوپی بورڈ سے فارم بھرا تھا اور تمام سبجیکٹ کے امتحانات د یے تھے تاہم بورڈ کی طرف سے اعلان ہوئے نتائج میں 96 طالبات کو بینکنگ موضوع میں ایک بھی نمبر نہیں دیا گیا ہے اور مارکس شیٹ میں ڈبلیو درج کر دیا گیا ہے۔ اس کی وجہ سے انہیں کسی بھی کالج میں داخلہ لینے میں مشکلات کا سامنا کرنا پڑ رہا ہے۔

طالبات نے کہا کہ اسکول کی طرف سے ایک لیٹر پیڈ جاری کیا گیا تھا اور اُن سے کہا گیا تھا کہ اس خط کی بنیاد پر کسی بھی کالج میں داخلہ مل سکتا ہے لیکن تعلیمی ادارے اُن کے نتائج کو نامکمل مان کر انہیں داخلہ نہیں دے رہے ہیں۔
طالبات کا کہنا ہے کہ اسکول انتظا میہ اور پرنسپل کی جانب سے انہیں کوئی جواب نہیں مل رہا ہے۔

انہوں نے ضلع مجسٹریٹ کے دفتر کے سامنے احتجاج کیا اور اُن سے اس مسئلہ کو سلجھا کر انہیں انصاف دلانے کی مانگ کی۔
اسکول انتظامیہ کے مطابق انہیں طالبات کے بینکنگ سبجیکٹ کے پیپر نہیں مل رہے ہیں، جس کی وجہ سے مارکس شیٹ میں اس سبجیکٹ کے نمبرات نہیں درج کیے گئے ہیں۔