سماجی تنظیم گھوسی سنگھرش سمیتی کے بینر تلے مئو میں چین کے خلاف احتجاج کیا گیا اور چینی صدر شی جنپنگ کا پتلا نذر آتش کیا گیا۔
مظاہرین نے بھارتی حکومت سے مطالبہ کیا کہ فوج کے جوانوں کی ہلاکت پر چین کے خلاف سخت اقدامات اٹھائے جائیں۔
ضلع مئو کی گھوسی تحصیل کے مدھوبن موڑ پر منعقد احتجاج کے دوران چین مخالف نعرے لگائے گئے۔ احتجاج کے اختتام پر دو منٹ کی خاموشی اختیار کرکے ہلاک ہوئے فوجیوں کو خراج عقیدت پیش کیا گیا۔ احتجاج میں مختلف مذاہب کے لوگ ایک پلیٹ فارم پر نظر آئے۔
مظاہرین نے مرکزی حکومت کے اعلیٰ عہدیداروں کے بیانات میں تضاد پر بھی تنقید کی اور کہا کہ وزیراعظم اور وزیر دفاع کے درمیان اتفاق رائے نہیں ہے۔ مظاہرہ کے دوران چینی اشیاء کی درآمد پر پوری طرح پابندی عائد کرنے کا بھی مطالبہ کیا گیا۔
