اترپردیش کے ضلع گوتم بدھ نگر میں کورونا کے معاملے میں تیزی سے ہورہے اضافے کے سبب ضلع انتظامیہ متحرک ہے۔
اس دوران ڈپٹی کمشنر انڈسٹریز اینڈ انٹرپرائز پروموشن سینٹر گوتم بدھ نگر انل کمار نے میسرز کنال بائیوٹیک کا اچانک معائنہ کیا، معائنہ کے دوران انہوں نے پایا کہ متعلقہ صنعتی یونٹ میں کووڈ 19 پروٹوکول کی خلاف ورزی کی جارہی ہے۔
کووڈ 19 پروٹوکول کے مطابق نہ تو کوئی ملازم معاشرتی فاصلے پر عمل کر رہا ہے اور نہ ہی ماسک پہن رہا ہے، صنعتی یونٹ میں کووڈ ہیلپ ڈیسک کا بھی کوئی انتظام نہیں کیا گیا۔
ڈپٹی کمشنر انل کمار نے اس کی رپورٹ سٹی مجسٹریٹ کو پیش کی جس کے بعد سٹی مجسٹریٹ اوما شنکر نے فوری ایکشن لیتے ہوئے میسرز کنال بائیوٹیک کو 24 گھنٹوں کے لئے سیل کر دیا ہے۔
انہوں نے کہا کہ ڈسٹرکٹ مجسٹریٹ کی ہدایت کے مطابق کووڈ 19 پروٹوکول کی خلاف ورزی کرنے پر کارروائی کو یقینی بنایا جائے گا تاکہ کووڈ 19 پروٹوکول کی تعمیل کو یقینی بنایا جاسکے اور ضلع میں کورونا وائرس کے پھیلاؤ کو روکا جاسکے۔
