سیٹوں کی تقسیم پر سیاست تیز

میرٹھ - ہاپوڑ لوک سبھا نشست پر بی جے پی میں اندرون خانہ کی بغاوت اس وقت سامنے آگئی جب 23 برس سے پارٹی سے وابستہ ونیت شاردا نے پریس کانفرنس کر کے پارٹی کو غور فکر کرنے کے لیے دو دن کا موقع دیا۔

ونیت شاردا نے پریس کانفرنس کے ذریعہ میڈیا کے سامنے کہا کہ میرٹھ- ہاپوڑ لوک سبھا نشست پر تقریبا 20 لاکھ بی جے پی ووٹر ناراض ہیں یہی وجہ ہے کہ مختلف مقامات پر موجودہ رکن پارلیمان راجندر اگروال کے خلاف احتجاجی مظاہرے کیے جا رہے ہیں۔

انہوں نے کہا کہ میری خواہش تھی کہ میرٹھ ہاپوڑ لوک سبھا نشست سے مجھے بطور امیدوار اتارا جائے لیکن پارٹی نے ایسا نہیں کیا بلکہ موجودہ رکن پارلیمان راجندر اگروال کو تیسری بار ٹکٹ دے دیا۔

انہوں نے مزیدکہا کہ غور و خوض کے لیے دو دنوں کا وقت ابھی باقی ہے، پارٹی پاس غوروفکر کر لے ورنہ ہمارے پاس کئی دیگر پارٹیوں کی جانب سے بیشتر مواقع ہیں۔

خیال رہے کہ ونیت شاردا گزشتہ 23 برس سے بھارتی جنتا پارٹی سے منسلک ہیں، اکھلیش اور مایاوتی کے دور اقتدار میں ان پر متعدد مقدمات درج کیے گئے ہیں۔