Uzma Parveen on Yogi عظمیٰ پروین پر سی ایم یوگی کو مافیا کہنے کا الزام، مقدمہ درج

آل انڈیا مجلس اتحاد المسلمین (اے آئی ایم آئی ایم) سے الیکشن لڑ چکی سید عظمیٰ پروین سرخیوں میں ہیں۔ عظمیٰ پروین پر ٹویٹر پر پوسٹ کیے گئے ایک ویڈیو میں اترپردیش کے وزیر اعلیٰ یوگی کو مافیا، ریپسٹ اور تشدد پر اکسانے والا کہہ کر مخاطب کرنے کا الزام ہے۔ ٹویٹ کی بنیاد پر عظمیٰ کے خلاف سائبر کرائم اسٹیشن میں مقدمہ درج کیا گیا ہے۔ Uzma Parveen Called CM Yogi A Mafia

لکھنؤ: اتر پردیش کے وزیر اعلی یوگی آدتیہ ناتھ کے خلاف سوشل میڈیا پر متنازع بیان دینے کے الزام میں سید عظمیٰ پروین کے خلاف سائبر کرائم تھانے میں مقدمہ درج کیا گیا ہے۔ قابل ذکر ہے کہ عظمیٰ لکھنؤ مغربی اسمبلی سیٹ پر آل انڈیا مجلس اتحاد المسلمین (اے آئی ایم آئی ایم) کے ٹکٹ پر الیکشن لڑ چکی ہیں۔

سائبر کرائم پولیس اسٹیشن میں تعینات ہیڈ کانسٹیبل سبودھ کمار پانڈے نے ایف آئی آر درج کرتے ہوئے کہا کہ ''آئی جی لا اینڈ آرڈر نے اس سلسلے میں ایک خط بھیجا ہے جس کے مطابق سید عظمیٰ پروین، جن کا ٹوئٹر ہینڈل @UzmaParveenLko ہے، نے سوشل میڈیا پلیٹ فارم ٹوئٹر پر وزیر اعلیٰ یوگی آدتیہ ناتھ کے لیے نازیبا الفاظ استعمال کیے ہیں۔'' ایف آئی آر میں بتایا گیا ہے کہ ''سید عظمیٰ پروین نے سوشل میڈیا پر اپنی پوسٹ میں سی ایم یوگی کو مافیا، ریپسٹ اور تشدد پر اکسانے والا بتایا، مزید یہ کہ انہوں نے یوگی کے خلاف ہتھیار اٹھانے کی دھمکی بھی دی۔'' حالانکہ عظمیٰ پروین ویڈیو میں وزیر اعلیٰ کو دھمکی نہ دے کر 'سنو دروپدی تم سشتر اٹھا لو' کے عنوان سے ایک کویتا سناتی نظر آ رہی ہیں۔

لکھنؤ کی رہنے والی سید عظمیٰ پروین اکثر اپنے بیانات اور کام کی وجہ سے سرخیوں میں رہتی ہیں۔ آل انڈیا مجلس اتحاد المسلمین (اے آئی ایم آئی ایم) سے اسمبلی کا الیکشن لڑ چکی عظمیٰ پروین نے حال ہی میں سوشل میڈیا پر ریاستی دارالحکومت لکھنؤ میں قانون ساز اسمبلی کے سامنے سڑک پر نماز ادا کرتے ہوئے ایک تصویر پوسٹ کی۔ عوامی مقامات پر نماز پڑھنے پر ان کے خلاف ایف آئی آر بھی درج کی گئی تھی۔ اس کے علاوہ سی اے اے اور این آر سی کے خلاف احتجاج کے دوران عظمیٰ پروین کے خلاف ٹھاکر گنج تھانے میں ایک درجن کیس درج کیے گئے تھے۔